ASSIT Kalaallit nerrivimmi arsaarartartut Islandimi angusarissaartut

Nerrivimmi arsaarartartut Islandimeersut, Savalimmiuneersut Nunatsinneersullu Reykjavikimi unammiuaarnerni peqataapput, pingaartumillu Ivik Nielsen, Sisimiuneersoq, sisamanik kuultinnannermigut takutitsilluarpoq.

Ivik Nielsen angutit pissartanngorniutivinneranni Islandimi pissartamut ajugaavoq, soorlu aamma angutit iligiikkuutaarlutik qatanngutinilu Aqqalu Nielsenilu kuultinnattut.

Angutit arnallu iligiikkuutaarlutik unammineranni Ivik Nielsen, Melissa Larsen peqatigalugu pissartanngorput, soorlu aamma angutini holdit ataatsimut isigalugit kalaallit kuultinnattut, tassami Ivik Nielsen, Aqqalu Nielsenilu Poul Jørgen Petersenilu kuultinnakkamik. Island katillugu 3-2-mik tassani ajugaaffigineqarpoq.

Kalaallit nerrivimmi arsaarartartut allat aamma siilvinnallutillu bronzinnapput.

- Kalaallit nerrivimmi arsaarartartut Pinsemi unammiuaarnerni ukiuni kingullerni aatsaat taama angusarissaartigaat, kalaallit sungiusaasuat Tommy Jørgensen oqarpoq.

Kalaallit Nunaanni nerrivimmi arsaarartartut kattuffiata siulittaasuat Emil Kleemann aamma nuannaarpoq:

- Nunat allat unammiuaarnerni peqataatitaqarnerusartut ajugaaffigisinnaagatsigit angusat takutippaat. Klubbinilu nunanullu allanut unammisartunik ineriartortitsinermi suliap iluatsilluarneranik takussutissaalluarluni, Emil Kleemann oqarpoq.