Kalaallit immikkut paarisassanngortitat utersinnaatitaanissaat ammaffigigaat

Nuummi pineqaatissinneqarsimasunut inissiisarfittaassami piffissami aalajangersimasuni misiliguteqarnissamik siunnersuut immikkut paarisassanngortitaallutik pineqaatissinneqartunut atuuttussanngortinneqarsinnaavoq. Konservative Folkepartiip Kalaallit Nunaannut tunngasunut oqaaseqartartua, Rasmus Jarlov, KNR-imut taama oqarpoq.

- Isumaqanngilanga sumi inissinneqarnissaq nammineq toqqarneqarsinnaassasoq. Aaqqissuussinerli nutaaq matumani eqquttussaavarput. Parnaarussallu pillaatissaminnik Danmarkimi atuinissartik pitsaanerusorigunikku tamatumunnga periarfissaqartinnissaat tunuartivissorusunngilara.

AAMMA ATUARUK Pineqaatissinneqarsimasut nuuttut peqqissimisinnaasariaqartut

Konservativet: Peqqissimisinnaaneq piffissami killilimmi periarfissaassaaq

Immikkut paarisassanngortitaallutik pineqaatissinneqartut Nuummi pineqaatissinneqarsimasunut inissiisarfittaassamut Herstedvester Fængselimit nuunneqarnerminnik peqqissimisinnaatitaanissaat Inuttut Pisinnaatitaaffiit pillugit Nunatsinni Siunnersuisoqatigiinnit siunnersuutigineqarpoq.

Nunatsinni pinerluttulerinermi inatsisip allanngortinneranut atatillugu tamanna pissaaq, tamatumani ilaatigut kalaallit Danmarkimi inissinneqarsimasut Nuummi pineqaatissinneqarsimasunut inissiisarfittaassamut nuunneqarnissaannut malittarisassat aalajangersarneqassammata.

AAMMA ATUARUK Pineqaatissinneqartut nuutsitaanertik naammagittaalliuutigisinnaasariaqarpaat

Kalaallilli immikkut paarisassanngortitaallutik pineqaatissinneqartut amerlasuut Herstedvesterimut uterusullutik kissaateqarnissaat Rasmus Jarlovip (K) ilimaginngilaa. Siunnersuutigineqartorli inatsimmut ilanngunneqassappat peqqissimisinnaatitaanissaq piffissami killilimmi atuuttariaqarsoraa.

Kalaallit nunaminni pillaatiminnik atuisinnaanissaat piffissaq ungasinnerusoq eqqarsaatigalugu siunertaavoq. Tamanna pissusissamisoorlunilu naleqqunnerpaavoq.

Piffissarli killeqartinneqartussaq qanoq sivisutigissanersoq oqaatigisinnaannginnerarpaa.

Socialdemokraatit itigartitsipput

Nunatsinni pinerluttulerinermi inatsisip allanngortinnerata akuersissutigineqannginnerani Inatsisartuni Folketingimilu suliarineqaqqaartussaavoq. Siunnersuutigineqartorlu akuersissutigineqassappat danskit naalakkersuisuisa illuatungiliuttut ilaannit taperserneqarnissartik pisariaqartissavaat.

Socialdemokraatilli Kalaallit Nunaannut tunngasunut oqaaseqartartuata Karin Gaardstedip kalaallit immikkut paarisassanngortitaallutik pineqaatissinneqartut peqqissimisinnaatitaanissaannik isumassarsiaq itigartippaa.

- Uteqattaarsinnaatitaanissaq (Herstedvesterip Nuullu akornanni, aaqq.) isumaqataaffiginngilarput.

Karin Gaardstedip erseqqissaatigaa kalaallit immikkut paarisassanngortitaallutik pineqaatissinneqartut Herstedvesterimit Nuummut nuunneqarnissaat Socialdemokraatit tapersersoraat. Toqqagassarli ataasiinnaasariaqarpoq.

AAMMA ATUARUK Søren Pind: Kalaallit parnaarussat Danmarkimiiginnarsinnaassapput

- Toqqagassinneqarnissaat isumaqataaffigaarput. Tamanna aamma naleqquppoq. Ataasiaannarlunili toqqaasoqassaaq. Inuimmi sakkortuupilussuarmik pinerluuteqarsimasunut pineqarnerat aamma eqqaamaneqartariaqarpoq. Nammineq piumasamik toqqaaginnartoqarsinnaassanngilaq, Karin Gaardsted oqarpoq.

Isumaginninnermut inatsisinillu atuutsitsinermut naalakkersuisoq, Sara Olsvig, Avannaani maanna angalasoq, oqaaseqartissinnaasimanngilarput.