Kalaallit Illuutaat assartuisut kukkuluttornerannit eqqugaasut
Danmarkimi kalaaliminernik inuit ataasiakkaat nassiussarsisussat kisimik eqqugaanngillat.
Royal Arctic Linemmi containerimik qerititsivimmik Aalborgip Umiarsualiviani pinsep nalaani sarfaaruttoorneratigut qerisunik nassiussat 2,2 tonsit annaaneqarmata, Aarhusimi Odensemilu Kalaallit Illuutaat aamma eqqugaapput.
AAMMA ATUARUK Kalaalimernit 2 tonsit igiinnagassanngortinneqartut
Odensemi Kalaallit Illuutaat umimmaap neqaanik, aalisakkanik panertunik, puisip orsuanik neqaanillu tikittoortussaagaluarpoq.
Qerisut taakku Kalaallit Illuutaata pisiniarfittaani nioqqutigineqartussaagaluarput, sapaatit-akunneratalu tulliani Inuiattut Ullorsiortoqarnissaanut kalaaliminernik amerlanerusunik piniartoqarsimagaluarluni.
Kalaalimerngit katillugit 50.000 koruunit missaannik naleqartut annaaneqarsimasut, Odensemi Kalaallit Illuutaanni pisortaq, Kirsten Mærsk, KNR-imut ilisimatitsivoq.
Aarhusimi Kalaallit Illuutaat aamma puisit neqaannik nioqqutissaminik annaasaqarpoq.
Kalaallit Illuutaanni pisortaq Jørn Holbech naapertorlugu, kalaalimerngit kiilut hunnorujut arlalialuit tikittoorutigineqartussaagaluarput, taakkulu Kalaallit Illuutaata pisiniarfittaani nioqqutigineqartussaagaluarlutik.
Kalaallilli Illuutaasa inuiattut ullorsiornermut aaqqissuussineri arlaannaalluunniit assartuisut kukkuluttornerannit eqqugaassanngitsut, KNR-imut taama ilisimatitsipput.
