Kalaalimernit 2 tonsit igiinnagassanngortinneqartut
Danmarkimi kalaallit kalaaliminernik nunatsinneersunik tigusinissaminnut neriuuteqartut 40-t utaqqisimagaluarput, sapaatip akunneratali siuliani ajuusaarnaqisumik nalunaarfigineqarput, tassa nerisassat utaqqisaat nerineqarsinnaajunnaarsimapput.
Tamanna Royal Arctic Linep kukkuneranik pissuteqarpoq. Containeri qerititsiviusoq poortukkanik 40-nik imaqartoq, Kalaallit Nunaanniit Aalborgimut tikimmat, containerip nuunneqarnerani innaallagiamut attavilinngitsoorneqarsimavoq.
Taamaattoqaraangat piaartumik paasineqartaraluarpoq, piinsikkunnili sulinngiffeqarnermi tamanna pimmat aatsaat kingusissukkut paasineqarpoq.
Royal Arctic Linep naammagittaalliuteqartarfiani akisussaasoq, Henning Jolmand taama ilisimatitsivoq.
- Ullut pingasungajaat innaallagissamut attaveqarsimanngilaq. Nerisassat ajortissimanerarlugit atuisunut sianernikuuvugut, tigorusukkunikkilli tigusinnaavaat, Henning Jolmann oqarpoq.
AAMMA ATUARUK Mary Arctica Arina Arcticamik taarserneqarallassasoq
Tamannali Royal Arctic Linep atuisartuminnut eqqorneqartunut innersuussutigerusunngilaa:
- Misissuinitsinni kiassuseq plusimiippoq neqillu containerimiiittut ilaat aagialitsersimapput, taamaammat tunniussinissarput tulluanngilaq, Henning Jolmand KNR-imut oqarpoq.
Atuisartulli nerisassanik ajortissimasunik annaasaqartut Royal Arctic Linemut maalaaruteqaqquai.
Suliffeqarfimmi qarasaasiatigut ajornartorsiuteqarnikkut taama kukkusoqanngitsoq, Henning Jolmandip isseqqissaatigaa.