Kalaallit assammik arsartartui ajugaapput
Assammik arsarluni, Pan Amerikanske mesterskabimut, kalaallit arnartaasa anngunniunnerminnut atatillugu, Puerto Ricomi klubbit ilaannut sungiusaammik unamminerminni 29-26-mik ajugaapput, muminnermi 14-9-mik siuaqqareerlutillu.
Arsarnermi saassussisarnerit ajunngitsumik ingerlanneqarsimasut, kalaallit arnat sungiusaasuata, Johannes Grothip iluarisimaarpaa oqarlunilu aamma illersuinerit ajunngilluinnartumik ingerlanneqartut.
Kalaallit arnartaannut silaannaap kiannerujussua ajornartorsiutaasinnaasoq, Johannes Grothip naatsorsuutigereersimavaa, taamaattumillu arsarnerup ingerlanerani paarlagaalluarnissaq siunniussimallugu. Målinik paasisut tamarmik minuttini 30-ini arsaapput. Målinillu paasisup aappaata, Rina Lorentzenip, arsaannermi minuttit 15-nit kingulliit målini paarsilluarpoq arsaannerup inerneranut aalajangiisuullluartumik.
Arsarnermi isertitat arsaaffiup saamiatungaaniit quligiluariarluni isertitsisoqarpoq. Tassani Sofia Lyberth tallimaraarluni isertitsisoq Arnaq Jensen sisamaraartoq.
Pan Amerikanske mesterskabemut anngunniunnermi kalaallit arnartaat aqagu ataasinngornermi siullermeerlutik unammissapput. Tassani unammissallugu USA.
