Kalaallit arnat nerrivimmi arsaarartartut gultinnallutillu sølvinnapput

Arctic Openimik taallugu unamminerit ulluisa appassaat ullumi ingerlanneqarpoq. Tassanilu kalaallit arnartaat pitsaalluinnartumik angusaqarlutik unammipput.

Nerrivimmi arsaararnermi inersimasunut Nunatta sungiusaasua, Tommy Jørgenseni tulluusimaaqisoq ima oqaluttuarpoq.

- Kalaallit arnat iligiiaat marluk tassani peqataapput. Tassalu normu ettinngorlutillu normu 2-nngorput, sungiusaasoq Tommy Jørgensen oqarpoq.

Angutit inersimasut aamma iligiikkaarluni unamminerni semifinalimut anngupput ullumilu unammillutik. Tassani Islandimiut unammineqarlutik. Tamannalu pissaganarluinnartumik ingerlanneqartoq, Tommy Jørgensen oqaluttuarpoq. Ajuusaarutigisaali tassaaneruvoq kalaallit 3-1-miik ajorsarmata.

- Tamanna ajoraluarpoq. Taamaattorli oqaatigisariaqarpoq, kalaallit iligiiaat marluusut tamarmik semifinalimut anngunneri tulluusimaarutissaammat. Taamaalilluta normu 3-nngorlutalu 4-nngorpugut, Islandimiunit ajornerulaaginnarluta, Tommy Jørgensen oqarpoq.

Ualeq manna unammisussaat tassaapput arnat angutillu iligiillutik unammineri aamma arnat angutillu marlukkaarlutik unammineri. Tommy Jørgensenillu neriuutigaa taakku aamma takutitsilluarumaarutut.

- Pitsaasumik angusaqarnissaput neriuutigaara tassami arnat angutillu iligiinneranni ajugaaasussatut naatsorsuunneqarpugut taamaalilluta finalimut anngunnissarput naatsorsuutaalluni. Timikkut sungiusarnerit qanoq pitsaatigineri tassani apeqqutaaginnarpoq oqartariaqarpungali kalaallit timikkut sungiusarluarsimasuupput, taamaattorli eqqaamasariaqarpoq unamminerit maanna ulluni pingasuni ingerlanneqqareerput assullu sakkortuujullutik. Neriuppungali angusaqarluarumaartugut. Tamanna assut pissaganarpoq.

Inersimasunut Nuna tamakkerlugu sungiusaasoq, Tommy Jørgensen oqarpoq.