PAN AM Kalaallit anngutissaganik Chile ajugaasariaqartoq
Tamatuma saniatigut Chile Argentinamut ajorsassanngilaq.
Aamma atuaruk PAN AM Minik: Tupinnarpoq
Nunatta assammik arsarlutik nunanut allanut unammisartui ippassaq Argentinamut ajugaammata nuannapput. Ullumili allamik eqqarsaateqarput.
Sulimi semifinalemut anngussinnaapput, taamaattoqassappalli unamminerit marluk Nunatsinnut ajunngitsumik inerneqarnissaat isumalluutaapput.
Unamminerlu siulleq tassaavoq Nunatta Guatemalamut ualeru unamminera. Nunarpulli tassani ajugaagaluarpat, suli unamminermik allamik isumalluuteqassaaq. Argentinami Chilemut unnugu unammissaaq, tassanilu Chilep ajorsannginnissaa Kalaallit Nunaata assammik arsarlutik nunanut allanut unammisartuisa sungiusaasuata, Niels Møllerip neriuutigaa.
Aamma atuaruk ASSIT & VIDEO Argentinamut ajugaareerlutik nuannattut takukkit
Amerikammi nunavittaani unammersuarnermut peqataasuni angusaqarluarnerpaat pingasut silarsuarmi pissartanngorniunnermut anngussapput.
Tamannalu anguniarneqarsimasoq, Møller oqarpoq.
Nunarpulli semifinalemut anngutinngitsuussagaluarpat suli anguniagassaqassaaq.
- Taava angusaqarluarnerpaani tallimaniinniarsarissaagut, tamannalu akuerisariaqassavarput. Taava tamaani misilittakkagut angusagullu toqqammavigalugit siunissami suliumaarpugut. Argentina Chilelu unnugu unammissapput, tamannalu pissanganarpoq, assammik arsarlutik nunanut allanut unammisartut sungiusaasuat Niels Møller oqarpoq.
Nunatta Guatemalallu unamminerat KNR-1-ikkut nalunaaqutaq 15:55-imit isiginnaarsinnaavat. Aamma Argentinap Chilellu unamminerat KNR-2-kkut nalunaaqutaq 19:55-imit isiginnaarsinnaavat.
