Kalaaleq eqaarsaarnermi Europami pissartanngortoq
- Inuuninni angorusutara anguara. Nuannaaqaanga angusagullu naammagisimaarlugit, soorunami aamma gulti pillugu. Ingammik gulti angujuminaakkaluartoq, pointinnattarnitigut anguarput, 18-inik ukiulik Lars Møller Kristiansen, KNR-imut taama oqarpoq.
Taanna Sorømut ukiut pingasut matuma siorna nuussimavoq eqaarsaartalerniarluni, maannalu eqaarsaarnermi Europamesteritut imminut taasinnaanngoreerluni.
Eqaarsaartartut 500-t Eruopaminngaanneersut Reykjavikkimi pissartanngorniunnermi peqataapput.
Unammisut naligiissimaqaat, Danmarkimiit Team-Gym, pississaarluni eqaarsaarnermi, 0,033 pointinik Norge ajugaaffigimmagu.
- Ajugaanissarput ilimagisimanngikkaluarparput, unammiffimmi ataasiinnarmilluunniit alloriaqqissimasuuguma gultinnassimanavianngikkaluarpugut, Lars Møller Kristiansen oqarpoq.
TeamGymimeersut eeqaarsaartartut 12-iupput. Takutitsilluarnerat dommerinit alutorisimaneqaqaaq. Danmark gultinnappoq, Norge sølvinnappoq Sverigelu bronzennalluni.
- Ingerlalluaqaagut, suleqatigiilluta takutitsinitsinni torrallaaqaagut, naggammillu unaminitsinni kusanarnerpaamik takutitsilluta.