Justus Hansen: Siumumi assortuuttoqalillaraangat nuna tamarmiusoq akiliisariaqartarpoq

- Naalakkersuisunngortussat ullumi akuersissutigaavut ajoraluartumilli demokrati tunngavigalugu taasinissap tunuatungaani ajornartorsiut annerusoq toqqoqqavoq: Tassalu inunnik taarseeqqittariaqalerneq, piffissami matumani Kalaallit Nunaata patajaatsuunissamik atajuarnissamillu pisariaqartitsitseruttorfiani, Justus Hansen allappoq itisiliillunilu:

- Assersuutigalugu Erik Jensen ukiut pingajuat avillugu ingerlanerinnaani immikkoortumi naalakkersuisut sisamassaattut ivertinneqarpoq, tamatumalu takutiinnarpaa ajortoqartoq. Nunatsinni politikkikkut siuttut taarseraappallaaqaat tamatumammi innuttaasut toqqissisimajunnaarsippai.

Kalaallit Nunaata naalakkersorneqarnerani "assallatserisoqaqqippoq", tamannalu timmisartunut suluusalinnut mittarfinnik sanaartornissanut illuliortiternissanullu atatillugu namminersortut aninngaasaliisartut milliartilikkaanik aningaasaliisinnaanissaannut isumaqatigiinnialeruttorfitsinni pivoq, Justus Hansen uparuaavoq qularnartoqarneranullu Siumut pisuutillugu.

- Nunami partiit annersaanni avissaartuuttoqarnera aamma qularnanngitsumik partiip kommunini marlunni kommunimut qinersinermi kinguariarnera pissutaalluni Naalakkersuisuni ilaasortanik taarseeqqikkallarujaagut. Siumumi assortuuttoqalillaraangat nuna tamarmiusoq akiliisariaqartarpoq, politikkikkullu aalajaatsuunissaq tunulliunneqartarluni, Justus Hansen Naalakkersuisuni ullumi taarsiisoqarnera pillugu oqarpoq.