Internettip siunissami akikinnerulernissaa Jens-Erik Kirkegaardip qularigaa
Illoqarfinni nunaqarfinnilu internetti akikinnerulersinnanersoq nalungallarparput, tamannalu paasiniartariarparparput!
Siumumeersoq Jens-Erik Kirkegaard taama oqarpoq. Taassumami kinguaattoorneq misissuinermut paasiniaanermullu atorusuppaa.
Attaveqaqatigiinnermulli naalakkersuisoq Knud Kristiansen isumaqarpoq, telekkut sullissinermi namminersortunngorsaanermut oqallinneq naammareersoq.
Aamma atuaruk Knud Kristiansenip Tele-Post sunianngilaa
Akissutit erseqqaarinngitsut
Inatsiseqareerpoq, telekkullu sullissinerup kikkunnilluunniit suliarineqarsinnaanngornissaata piviusunngornissaanut, Tele-Post kisiat utaqqilerparput.
Kisianni tamaakkaluartoq, naalakkersuisuusimasup Siumumeersup Jens-Erik Kirkegaardip oqalllineq tamatumunnga tunngasoq aallarteqqikkusuppaa.
Sullissinermik tamatuminnga namminersortunngorsaaneq innutaasut aningasaaataannut internettikkullu attaveqaatinut qanoq kinguneqarsinnaanersoq ersarivissutut taassuma misiginngilaa.
- Politikkikkut aalajangiinerit toqqammaviusariaqarput timitaliiniarnermi. Qanoruna innuttaasunut kinguneqarniartoq? Ukua imaappata taava atuisut qanoq akiliissappat? Taakkununnga qanoq kinguneqassava? Nunarput tamaat ataatsimut isigalugu internetti akikillissua, imaluunniit illoqarfiit ataasiakkaaginnaat? Apeqqutit taamaattut suli akissutai erseqqaarinnginnamik, Jens-Erik Kirkegaard oqarpoq.
Taassuma assersuutitut eqqaavaa, Qallunaat Nunaanni internettimik nioqquteqarneq kikkunnut tamanut ukiorpaaluit matuma siorna periarfissaalermat, attaveqaatit ajorseriarsimasut, naak nuna annertoorsuunngikkaluartoq.
Telekkullu sullissinermi namminersortunngorsaaneq ilumut piviusorsiortuunersoq nalorninartippaa, tassami nunarput inukimmat. Tamannalu oqallinnikkut akissutissarsiortariaqaripput, Jens Erik Kirkegaard isumaqarpoq.
Aamma atuaruk Akikinnermik internetseqalernissaq piviusunngunngikkallalertoq
Oqallinneq naammassereertoq
Telekkut sullissinermi namminersortunngorsaaneq ukiorpaaluit ingerlasimavoq, internettikkullu attavimmik Tele-Post apriilip aallaqqaataani tuniniaalertussaagaluarpoq. Tamannali piviusunngunngitsoorpoq.
Piviusunngortitsinngitsoornermullu pissutaavoq Tele-Postip siunnersortiminut aningaasartuutai ingasappallaamik alliartorsimammata.
Attaveqaqatigiinnermut Naalakkersuisup Knud Kristiansenip Jens-Erik Kirkegaard eqqartueqatigerusuppaa, kisiannilu oqallinneq naammassereertutut nalilerlugu.
Tele-Postip qaqugu piareersinnaanissani sapaatip-akunnerini tulliuttuni nalunaarutiginiarpaa.
Aamma atuaruk Kinguartitsisoqarsinnaanera Naalakkersuisut ilisimasimavaat
