Isumaqatigiinniarnerit Mette Frederiksenimut artornassasut
- Qanoq inissisimasoqarnera ilisimaneqareerpoq. Pissutsit ilaat isumaqatigiissutaapput aammali isumaqatigiinngissutaasunik ilaqarlutik. Partiinit soqutigineqartut oqaluuserissavagut, taava takussavarput qanoq pisoqassanersoq, Mette Frederiksen Ritzauimut taama oqarpoq.
Nunanit allamiunut politikki sukannersoq, VKAL-ip naalakkersuisuisa ingerlataannut assingusoq Socialdemokraatit aalajangiusimavaat. Suliassaqarfimmili malittarisassanik oqilisaanissaq Radikale Venstrep piumasaraa - ilaatigut akuulersitsiniarnermut ikiorsiissutit atorunnaarsinneqarnissaat, Danmarkillu qimaasunik Naalagaaffiit Peqatigiit amerlassusiligaannik tigusinissaa partiip piumasaraa.
AAMMA ATUARUK Aki-Matilda: Suli qineqqusaartoqannginnerani isumaqatigiinnialereerpugut
SF-illu nunanit allamiunut suliassaqarfiup naakkittaannerusumik isumagineqarnissaa piumasaraa, ilaatigullu nunamut qimaasutut isernissamik qinnuteqarlutik itigartitaasut Udrejsecenter Sjælsmarkimiitinneqartut pitsaanerusunik atugaqarnissaat partiip kissaatigaaa.
Mette Frederiksenilu ministeriuninngortinneqassappat Socialdemokraatit partiinit taakkunannga marlunnit tapersersorneqarnissartik pisariaqartippaat.
Mette Frederiksenillu ullumikkut isumaqatigiinnissat isumalluarfigai.
- Politikkikkut isumaqatigiissutigisinnaasatta oqaloqatigiissutigineqarnerisut isigaara. Partiit arlaannaalluunniit naveersinnavianngilaq. Taamaammat aamma isumaqatigiinniarnerit nuannersumik ingerlannarput.
AAMMA ATUARUK Aaja Chemnitz Larsenip Mette Frederiksen qanimut suleqatigisinnaassasorigaa
Nunatsinni nunanit allamiunut suliassaqarfik Danmarkimi suli akisussaaffigineqarpoq. Nunatsinnullu qimaasutut qanitukkut siullerpaamik tikittoqarpoq. Namminersorlutilli Oqartussat kommunillu tamatumunnga piareeqqasimannginnerat Inuit Ataqatigiinnit ilaatigut isornartorsiorneqarsimavoq.
Nunatsinnit qinikkat, Aki-Matilda Høegh-Damip (S) aamma Aaja Chemnilz Larsenip (IA), Mette Frederiksen piinsi sioqqullugu arfininngornermi ataatsimeeqatigaat. Naalakkersuisunngortitsiniarluni isumaqatigiinniarnernut qaqugu aggersaqqinneqassanersut suli nalunarallarpoq.
AAMMA ATUARUK Qimaasoq siulleq tikippoq
