Issittumi uuliasiornermi malittarisassat sukannernerusut
Ilimaginngisamik pisussanut piareersartalernissaannut malittarisassat uuliasioqatigiiffissuit pinngitsaalissavaat, soorlu qillerivinni uuliamik mingutsitsisoqaleraluarpat teknikikkulluunniit ajornartorsiuteqaleraluarpat piareersimasalernissaannut.
Pilersaarutit taamaallaat misileraalluni qillerinernut atuuttut, amerikami nunamut namminermut ministereqarfiup uuliasioqatigiiffiullu Shellip oqallittarnerpassuisa inerneraat. Shellillu Chukchip imartaani Ualerngup tarajuanilu qillerilernissaanut sillimaniarnermut piareersimanerulernissaat anguniarneqarluni.
Uuliasioqatigiiffik Shell 2012-imi qillerivimmini Alaskamiittumi Kullummi assut ajornartorsiuteqartarsimavoq. Ajutoorsimagaluaruni ajunaarnersuaqartitsisimassagaluarpoq.
Malittarisassat nutaat miseleraalluni qillerinerni piareersimanissanut atuupput. Ilaatigut kalittaatit amerlanerit, qulimiguullit minnerpaamik ataatsimik ilallugit, pingaarnerpaatullu qilleriviup ungasinngisaani allamik immikkut qilleriveqarnissaq, qilleriviup atuuttup ajutoorneratigut aqunneqarsinnaajunnaaraluarpalluunniit atuutsinneqalersinnaasumik, piumasarineqarlutik. Aammattaaq uuliasioqatigiiffik ungalusaliamik sanassaaq misileraallunilu, uuliamik aniatsitsisoqaraluarpat siaruatsaaliisussamik.
