Isikkamik arsaalluni 2020-mi EM-ertoqalerpat Danmark aaqqissueqataalersoq
Europami isikkamik arsaattartut kattuffissuata, UEFA-p, ukiunik 60-inngortorsiornerminut atatillugu pissartanngorniunnerni nunat 13-it aaqqissuisussatut toqqarpai, taakkununngalu ilaavoq Danmark.
Gruppeni unamminerit pingasut 1/8-finalilu ataaseq Parkenimi ingerlanneqassapput.
Semifinalit finalilu Tuluit Nunaanni illoqarfiit pingaarnersaanni Londonimi ingerlanneqassapput.
Skotlandimi Glasgow, Belgiami Bryssel, Ungarnimi Budapest, Spaniami Bilbao, Irlandimi Dublin Hollandimilu Amsterdam, Danmark assingalugu, gruppeni unamminernut pingasunut 1/8-finalimullu ataatsimut aaqqissuisuussapput.
Tysklandimi Müncheni, Italiami Romimi, Ruslandimi Sankt Petersborgimi Aserbajdjanimilu Bakumi gruppeni unamminerit pingasut kvartfinalilu ataaseq ingerlanneqassapput.
Qinnuteqartunit 19-iusunit Danmark toqqarneqarpoq.