Nanunimmat kommuni eqqakkanut aaqqiissuteqarnialerpoq

- Naalakkersuisut ikioqatigerusoqaavut. Misilittakkagut ilisimasagullu ingerlateqqinnerisigut ikioqataasinnaavugut, pinngortitaq pillugu nunarsuaq tamakkerlugu suliniaqatigiiffimmeersoq, Kåre Winter Hansen oqarpoq, ilanngullugulu oqarluni, nannut ilaatigut eqqakkat akornanni nerisassarsiorlutik illoqarfimmukartartut.

Ajornartorsiullu taanna kommunimit aaqqiivigineqarniarsarivoq.

- Nannut pillugit ajornartorsiut piffissami kingullermi aatsaat eqqumaffigillualerparput. Tappavani nanorpassuaqartoq tusallattaavarput, nannullu pillugit ajornartorsiummut aaqqeeqataasinnaasunik eqqagassat pillugit pilersaarusiatsinnut qanoq ilanngussisinnaassalluta eqqarsaateqarpugut, Kommuneqarfik Sermersuumi ingerlatsinermut pisortaq, Frank Rasmussen oqarpoq.

Aamma atuaruk Illoqarfinni nanoqarnerulissasoq WWF-ip naatsorsuutigaa

Eqqakkat tamarmik sapinngisamik ikuallanniartaraat, taassuma oqaatigaa.

Eqqakkanilli ikuallaavik pitsaanerpaajunngimmat eqqakkat sinneruttut assaanneqartariaqartarput.

- Sila pissutigalugu aasakkuinnangajak kisimi assaasinnaasarpugut, taamaammallu eqqakkat namminneerluta inissittariaqartarlutigit. Unammillernartumik suliassaqarluta oqartariaqarpugut. Aamma nannut maanna eqqarsaatigisariaqarpavut, tamannalu aamma unammillernassalluni. Ajornartorsiutinut aaqqiissutaasinnaasunik soorunami maanna ujartuivugut, Frank Rasmussen oqarpoq.

Pinngortitaq pillugu nunarsuaq tamakkerlugu suliniaqatigiiffiup nannunik nakkutilliisunik qimaatitsisartunillu Ittoqqortoormiini pilersitsisut, siornatigut oqaluttuarereerparput.

Aamma atuaruk Nannut Ittoqqortoormiit illoqarfiannut pisartut amerlapput

Oqartussaasuninngaanniilli tamanna suliarineqartussaagaluartoq tikkuarneqarpoq.

Apeqqulli tassaavoq, kikkut ajornartorsiutip aaqqiiviginissaanut akisussaasuunersut.

- Politiit tamanna susassaqarfiginngilaat. Pinngortitamut tunngasunut ingerlatsisut tamanna akisussaaffigaat, Kalaallit Nunaanni Politiini unnerluussisuuneq, Morten Nielsen oqarpoq, nannulli illoqarfinnut pigaangata politiit iliuuseqartartut erseqqissaatigalugu.

- Nannut ulorianartorsiortitsippata ajunaartoqarnissaa pinngitsoortinniarlugu politiit soorunami iliuuseqartarput, pisariaqaraangallu nanup toqunnissaanut ikioqataallutik. Namminersorlutik Oqartussalli nakkutilliineq suliassarivaat, Morten Nielsen oqarpoq.

Taamaalilluni ajornartorsiut Naalakkersuisunit suliassaalerpoq.

Aamma atuaruk Nannut Svalbardimi nujuillisoorutigineqartut