Imigassaq 1979-imili inerteqqutaavoq - iranimiullu suli imertarput
Islammimi 1979-imi mumisitsisoqarmalli imigassaq silaarunnartulik inerteqqutaasimagaluartoq iranimiorpassuit, ingammik pigissaartut, imigassartortarput.
Amerikamiut aviisiat The New York Times naapertorlugu iranimiorpassuit imigassamik ajornartorsiuteqarnerat Iranimi pisortatigoortumik akueriniarneqalersimavoq.
Imigassamik pinngitsuuisinnaajunnaarsimasut katsorsarneqartalernissaannut, peqqissutsimut ministereqarfik 2015-mili peqqussuteqarpoq; kingornalu namminersortut naalagaaffillu katsorsaavippassuarnik ammaasimapput.
USA-mi maligassiarineqartoq assilillugu "Alcoholics Anonymous" AA-nik ingerlatsisalersimasorpassuit Irami naalakkersuisut akuerisimavaat.
Allaat naalakkersuisut pisortatigoortumik paasissutissiortalersimapput, iranimiut imigassartorsimallutik biilertannginnissaat pillugu. Taamaaliornissaq ukiualuit matuma siorna takorloorneqarsinnaasimanngilaq.
Kisitsisit pisortatigoortut ersersippaat nunami islamiskiusumi tassani minnerpaamik innuttaasut 10 procentii silaarunnartulinnik imigassartortartut.
Iranimi tusagassiuutit imigassaq allaaserigaagamikku nalunaartarput, iranimiut imigassartoriaasaat ingasangaarmat - allaat russit tyskillu imertaasaannut naleqqersuunneqarsinnaalluni.
Aamma imigassamik silaarunnartulimmik Iranimi pissarsinissaq ajornanngeqaaq. Inerteqqutaasumik pilersuifferujussaq siaruarluarsimasoq sianerfigilaaginnarlugu aggiussisartoq, The New York Times allappoq.
/Ritzau
