Inuusuttut amerlanerusut aalisalernissaat aqqutissiuunneqartoq
Imarsiornermik Ilinniarfimmi ilinniarsimasut allatulluunniit aalisarnermik misilittagaqartut akuersissummik immikkut ittumik tunineqarsinnaanngussasut, aalisarnermut, piniarnermut nunalerinermullu naalakkersuisoqarfik taama allappoq.
Aammattaaq sinerissap qanittuani qaleralinniarnermi aalisariummi inuttaasimagaanni nammineq akuersissuteqalernissamut periarfissaqalissaaq.
Taamatut allannguuteqartitsinikkut inuusuttut amerlanerusut aalisarnerup iluani, nunatsinni tunisassiornikkut inuussutissarsiutini aningaasarsiorfiunerpaasumi, ingerlataqalernissaat siunertarineqarpoq.
Sinerissap qanittuani aalisakkanik suugaluartunilluunniit aalisarsinnaatitaalissapput
Peqatigisaanittaaq immikkut ittumik akuersissuteqartitsinikkut aalisartut inuusuttut sinerissap qanittuani aalisakkanik suugaluartunilluunniit aalisarsinnaatitaalissapput, saarullinniarnermullu tunngatillugu malittarisassat immikkut ittumik oqilisinneqassallutik.
Qeqertarsuarmiilli Upernaviup tungaanut qaleralinniarnermi inuusuttut aalisartut allatuulli akuersissummik qinnuteqaqqaartassapput.
Aalisartut inuusuttut malittarisassat nutaat atussagunikkit nammineq umiatsiaqartariaqarlutillu aalisarnermut atortoqartariaqarput.