Inunnik isumaginninnermik suliallit sipaarniarnermi eqqugaassanngillat
Kommuneqarfik Sermersuup illoqarfiini sisamaasuni sulisut soraarsitsiortortoqassasoq ullaaq nalunaarfigineqarput.
- Sulisut tamakkerlugit ullaaq qulingiluanut katersorniarsaraagut, aamma tv-kkoorlugu Paamiuni, Tasiilami Illoqqortoormiunilu sulisugut peqataapput. Tassani nalunaarutigaarput inuit 75-it soraarsittariaqarlutigit, Kommuneqarfik Semersuumi pisortaaneq Steffen Ulrich-Lynge KNR-imut taama oqarpoq.
AAMMA ATUARUK Sermersuup atorfiit 75-it atorunnaarsippai
Kommuneqarfik Sermersuumi pisortat borgmesterillu erseqqissaatigaat kommunip inunnik isumaginninnermik suliallit soraarsitaanavianngitsut.
Nalunarallarporli ilinniartitsisut, aqqusinilerisut allalluunniit qassit soraarsinneqassanersut. Taannarpiaq kommuneqarfimmi atorfillit nalilersussallugu suliaq ingerlatileruttorpaat. Kommunimi pisortat soraarsitsiortornissamut piareersarnemi suleriaasissaq pillugu ippassaq ataatsimiissimapput. Pisortallu suliakkinneqarsimapput.
- Pisortat suliffimminnut pigunik massakkorpiaq suliassaraat kikkut soraarsinneqassanersut misissussallugu. Tassani pisariaqarluinnaqqissaarpoq paasissallugu aalajangersimaqqissaartumik iliuuseqarniaratta. Imatut paasillugu inussiornata piniaratta sulisulli atorfissaqartitavut atorfissaqartinngisavullu immikkoortiterlugit pisussaavagut, Steffen Ulrich-Lynge oqarpoq.
AAMMA ATUARUK Kommuneqarfik Sermersuumi taasisoqarnerani aniinnartut
Taassuma kikkut soraarsinneqassanersut novembarip naanerani paasinarsissasoq aamma oqaatigaa.
Soraarsitsiortornissamili apeqqutit pingasut oqimaalutaasuussasut, Stefen Ulrich-Lynge, oqaatigaa, tassalu:
Sulisut ataasiakkaat suliaminnut qanoq pikkoritsigaat? Qanoq suliaqartigaat? Aamma kommunip atorfissaqartitaanik inuttut piginnaasaqarpat?
Asii Chemnitz Narup Radioaviisimi toqqaannartumik ullumi apersorneqarnermini soraarsitsiortornerit kommunip aningaasanik aqutsinerlunneranik patsiseqanngitsut oqaatigaa.
