Inuit aallarussat timaat Labradorimut angerlartinneqalersut
Atuagaq taaguuteqarpoq In the Footsteps of Abraham Ulrikab (Abraham Ulrikabip tumai atuarlugit), nagguteqatigiillu Inuit arfineq-pingasut qatanngutigiinniat ajoqersortitaat akerliugaluartut 1880-imi Labradorimit aallarunneqarnerat pillugu atuakkiaalluni.
Taakku Europaliaanneqarput Hagenbeckillu Uumasuusivissuini, ilaatigut Hamborgimi Parisimilu, 1880-imi upernaakkut takutinneqarput.
Norgemiup umiarsuup naalagaata Jakobsenip, taakkuninnga aallertuusup, kuppilersinngitsoorsimavai, taamaammat qaammatialuit qaangiutiinnartut tunillanneqarlutik tamarmik toqusimapput.
Toqusut timaat nassaarineqarput
Atuakkiortuusoq, France Rivet KNR-imut oqaluttuarpoq oqaluttuassarsiani alutorinermut misissuineq aallartissimallugu, Inuillu aallarussasut arfineq-pingasuusut timaat, periarfeerunneqarsimasorineqartut ujaarisimallugit.
Tamannalu iluatsippaa, ilaat Tysklandimi ilaallu Frankrigimi nassaarisimallugit.
VIDEO Abraham Ulrikab kinaava?
Inuit arfineq-pingasuusut ittuata Abraham Ulrikabip kissaataasa kingullersaat taassaasimavoq Labradorimut angerlarteqqinneqarnissartik. Taamaammat France Rivetip Nainimi utoqqartaasut oqaloqatigiartorsimavai, taakkulu tamarmik Nainimut angerlarteqqinnissaat isumaqataaffigaat, Qatanngutigiinniat ileqqui malillugit ilisaaniassammata.
Kissaataa kingulleq naammassineqartussanngorpoq
Angerlartinneqarnissaalli qaammatialuit qaangiuppata aatsaat iluatsissinnaassasoq, Nunavutsiavummi naalakkersuisut siulittaasuat Sarah Leo atuakkamik saqqummersitsinermut atatillugu oqarpoq.
- Qanoq ilillugit utertinneqassanersut misissorneqaqqaassaaq, aamma kinguaajusut nassaariniarneqaqqaassaapput.
Abraham Ulrikabilli kissaataa kingulleq naammassineqartussatut maanna isikkoqarpoq.
