Qulaarpaa Inuiaqatigiit pillugit ilisimatuup politikerit isumalluarfigai
Sisamanngornermi qulaarpaaqareersoq politikerit nersorneqarput.
- Inartsisartut oqallittarnerannik malinnaasuusutut qiimmaallaqaanga, sammisaminnik pimoorussimmata isumassarsiaqaqalutillu, ulluni allani maqaasinartartunik, inuiaqatigiit pillugit Ilisimatusarfimmi ilisimatooq, Birger Poppel, oqarpoq.
Taassuma minnerunngitsumik nuannaarutigaa, politikerit arlaqartut oqarmata, inuit nunaqarfinni inukilliartortuni najugaqartut tusaaneqartariaqartut.
Takusartakkat nuanninngitsut ilisarnartut
Aamma innutaasunik peqataatitsinermut assersuutissaasutut nunaqarfiit pillugit siorna atatsimeersuarneq eqqartornerqarpoq. Birger Poppelilli takusartagaanut ajoraluartumik aamma ersiutaavoq.
- Inunnik, taakkua nunaqarfimmiuuneri erseqqisarlugu, aggersaariarluni, ukioq ataaseq qaangiummat susoqavissimanngineranut tamanna assersuutissavissuugunarpoq.
Aamma atuaruk Qulaarpaa Najugaqarfiit ima mianerisariaqartigivoq
Aamma atuaruk Qulaarpaa Nunaqarfiit siulittaasuat iliuuseqaqqusivoq
Poppel isumaqarpoq, nunaqarfimmiut iluuuseqarnissamik maanna utaqqitinneqartut, ataatsimmeersuarsimanerlu siornatigut ataatsimeeesuartarsimanernut eqqaanartoq.
- Ataatsimeersuartitsinikkut ilerasuutissaaruteriarluni, susoqaqinnanilu. Taava Ingerlaqqittarput, soorlulu susoqarsimanngitsoq.
Tikipallak aallapallak
Birger Poppel isumaqarpoq, nunaqarfimmiut peqataatinneqarnerusinnaagaluartut. Pineqartut qulaatiinnarlugit ukiuni qulilikkaani kingullerni iluarsaaqqinnerit suliarineqartarsimasut taassuma tikkuarpaa.
- Taamanikkut tikipallallutik oqaatiginiakkatik apuuteriarlugit nalunaaquttap akunneri marluk qaangiukkaangata aallaqqittarput. "Taava tassa taanna nammasivoq oqaloqatigiittoqareerrpoorlu". Kisiani taamattoqanngilaq.
Taamannalli misilittagaqaraluarluni sisamanngornermi politikerit Qulaarpaami saqqummiussaat upperiumavai.
- Uukapaarpasissinnaaagaluarlunga, isummiussat saqqummiunneqartut, taakkuninngalu saqqummiusseriaasiat takullugit isumalluarsinnaavunga, inuiaqatigiit pillugit Ilisimatusarfimmi ilisimatooq, Birger Poppel, oqarpoq.