Ilinniarneq

Ingeniørinngorniaq nersornaammik Jonathan Prisenimik tunineqartoq

Nersornaat Jonathan Prisen 2015, Jonathan Motzfeldts humørprisimik siornatigut taaguutilik, Danmarks Tekniske Universitetimi civilingeniørinngorniamut Thomas Ravnshøj Johansenimut tunniunneqarpoq.

Allattoq Mads Lynge

novembarip 30-at 2015 05:39

Thomas Ravnshøj Johansenip DTU-mi 2015-imi bachelorinngorniutini pitsaanerpaatut toqqarneqarsimanera Odensemi novembarip ulluisa 19-ianni saqqummiunneqarpoq.

Kiammik siammarterummik pumpe Issittuni illunik kiassaasussaq Thomas Ravnshøj Johansenip suliniutigaa. Suliniut DTU-mi annertunerusumik misissuinermut ilaavoq, ilaatigut Norgemi, Islandimi Savalimmiunilu Issittumi illunik nutaaliorluni kiassaanissamut misileraalluni ineriartortitsisoq, Ravnshøj Johansenillu kiammik siammarterutaa Nunatsinni illuni ataasiakkaani ikkussuunneqareersimalluni.

Aamma atuaruk Ingeniørinngorniaq nersornaasigassatut innersuunneqartoq

Suliniut taanna ukioq manna pitsaanerit ilaattut toqqarneqarpoq, Odensemi novembarip 19-ianni symposiaqartitsisoqarnerani toqqarneqarluni. Nunatsinnit ilinniartutut immikkuullarissumik angusaqarnera Jonathan Prisenimi siulersuisut maluginiarpaat, aningaasaateqarfimmiillu qiimmassaammik nersornaaserneqarnissaa siulersuisut isumaqatigiissutigaat.

Nersornaat Jonathan Prisen 50.000 koruuninik aningaasartaqarpoq, siulersuisullu tunniussinissamut tunngavilersuutigisaasa ilaat tassaavoq Thomas Ravnshøj Johansen allanut maligassiuilluarmat, Jonathan Motzfeldtillu nammineq oqarneratuut nersornaat tigusisumut qiimmassaataassaaq.