Inersimasut MIO-mut saaffiginnittartut amerlisut

Kalaallit Nunaanni meeqqat pisinnaatitaaffii pillugit sullissivik MIO ilisimaneqaleraluttuinnarpoq tamannalu Meeqqat illersuisuata nuannaarutigaa. Inersimasut meeqqat pillugit saaffiginnittartut marloriaatinngorsimasut, MIO-p nalunaarusiaani saqqummeqqammersumi atuarneqarsinnaavoq.

- Inersimasut meeqqat atugaannut tanngutillugu kommuninut saaffiginnissimallutik akissutisiatik amigaateqarsorigaanngamikku siunnersoqqullutik MIO-mut saaffiginnittarput, Meeqqat illersuisusat  Aviâja Egede Lynge KNR-mut oqarpoq.

Aamma atuaruk MIO-p SMS-ikkut siunnersuisarfia atorluarneqartoq

Meeqqat pisinnaatitaaffiisa qulakkeerneqarnissaat anguniarlugu MIO Najortimik taaguuteqartunik aamma pilersitsereerpoq.

Meeqqat kommunimut oqaloqatiginnissatillugit Najortimik taaneqartartunik tulaaveqartalersinnaannerat atorluarneqaleriartortoq, Meeqqat illersuisuata oqaatigaa.

- Meeqqat imminermut tunngasunik kommunit suliassaqartillugit inersimasumik  najorteqarsinnaapput. Taamaalillutik meeqqat peqataatinneqarlutillu pisinnaatitaaffii qulakkeerniarneqartalerlutik,  Aviâja Egede Lynge oqarpoq.  

Nuummi, Sisimiuni Maniitsumilu  Najortimik taaneqartartut atuupput. Illoqarfinnilu allani pilersitsisoqarnissaa aamma pilersaarutaasoq, meeqqat illersuisuata oqaatigaa.

MIO-p nunaqarfiit illoqarfiillu katillugit 19-t siona angalanermini tikissimavai.