MIO-p SMS-ikkut siunnersuisarfia atorluarneqartoq
MIO-p, meeqqat pisinnaatitaaffii pillugit sullissiviusup, ukiumut 2015-imut nalunaarusiaani erserpoq meeqqat inuusuttullu SMS-ikkut siunnersorneqartarfiat 1.207-arluni saaffigineqarsimasoq.
Taakkunannga 520-t niviarsiaraapput, 82-t nukappiaraallutik 605-millu nukappiaraanertik niviarsiaraanertilluunniit nalunaarutigisimanngikkaat.
Inuttut ajornartorsiuteqarneq, qinngasaarneqarneq, kinguaassiutitigut atornerlugaaneq, imminut toqukkusunneq ikiaroornartumillu atornerluineq SMS-ikkut saffiginnissutaasartut ilagaat.
Ukioq kingulleq saaffiginninnerit ukiup siulianut sanilliullugit 200-nik amerleriarsimapput.
Meeqqat inuusuttuaqqallu siunnersortinnissaminnik pisariaqartitsisut 1899-it SMS-erlutik saaffiginnissinnaapput.
MIO-p nalunaarusiaa allaaserisap ataaniittoq atuarneqarsinnaavoq.