Assi: Mittarfeqarfiit

Inatsit tuaviortup mittarfiit aningaasalerneqarnissaat qulakkiissagaa

Inatsisartut inatsisissatut siunnersuut mittarfinnut pilersaarutip aningaasalernissaanik qulakkeerutaasussaq tuaviortumik oqallisigissagaat.

Inatsisartut aningaasanut inatsit, aalisarnermi akileraaruseeriaaseq nutaaq kiisalu aningaasaliissutinit iluanaarutinut soraarnerussutisianullu akileraartarnermut inatsit nutaaq ulapputigileruttarpaat.

Naalakkersuisullu suliaqarnerani allamik suliassamik sisamanngormat tuavisaartumik takkuttoqarpoq. Inatsisissatut siunnersuut ilaatigut nunatta avataaniit suliartorlutik tikittut, mittarfittaassanik sanajartortussat akileraartarnissaannut tunngasoq ulluni sisamani sapaatip akunnerata tulliani pinasuartumik oqallisigineqassaaq.

Naalakkersuisut inatsisissatut siunnersuutaat marlunnik imaqarpoq, tamarmillu Qaqortumi, Nuummi Ilulissanilu mittarfinnut pilersaarutip aningaasalernissaanut tungapput.

Akileraarut nunatta karsianukassasoq

Siullertut, Naalakkersuisut nutaanik mittarfiliornissamut pilersaarummi suliartorlutik nunatta avataaniit tikittut aningaasarsiaanit akileraarutit nunatta karsiata pisassagai siunnersuutigaat.

Taamaalilluni avataanit suliartortut nunatsinni akileraartarutaat kommunit nunattalu karsiata akornanni agguaanneqarnatik, nunatta karsiata pisassavai. Tamannali sulisunut kalaallit kommuniini qaammatini arfinilinni amerlanerusuniluunniit najugaqarsimasunut atuutissanngilaq.

AAMMA ATUARUK Mittarfiit allamiunik sulisoqarluni sanaartorneqassasut

Naalakkersuisut avataanit suliartortut kommunit ikiorsiissutaannik atuivallaassannginnerat tunngavilersuutigaat. Taavalu, Namminersorlutik Oqartussat immikkut aningaasat taakku mittarfiliornermut ilaatissavaat.

200 - 400 millionit koruunit akornanniittut isertitassatut qulakkeerneqassasut

Siunnersuummi immikkoortup aappaa soraarnerussutisiat akileraarusersortarnerannut malittarisassaanik allannguiniarneruvoq. Taamaaliorneq PFA Soraarnerup soraarnerussutisiassatut katersanit aningaasaliissutitut inississorsimasaasa, 1 milliardit koruunit PFA Danmarkimut nuunnissaannut pilersaarutaanik qulakkeerissutaassaaq.

Soraarnerussutisiassatut katersanit aningaasaliissutitut inississorsimasat nuunneqarnerani PFA Soraarneq Namminersorlutik Oqartussanut ataasiaannarluni akitsuutinut 200 – 400 millionit koruunit akornanni akiliissaaq. Pilersaarut naapertorlugu aningaasat taakku Kalaallit Airportsimut atorneqassapput, mittarfinnillu pilersaarummi sanaartugassanik qulakkeerissalluni.

AAMMA ATUARUK Sinneqartoorutinit aningaasaliissuteqarusuttut

Aningaasanut inatsit sapaatip akunnerani matumani aappassaaneerneqarnerani aningaasaqarnermut Naalakkersuisup, Aqqaluaq B. Egedep Naalakkersuisut Kalaallit Airportsip aningaasalerneqarnissaanut siunnersuutaat aningaasanut inatsip pingajussaaneerneqarnissaanut nassiussinnaassallugu neriuutigigaat oqaatigaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!