Inatsisitigut innarlitsaalisaaneq equngasortaqartoq
Danmarkimi Eqqartuussissuserisut isumaqalioqatigiissitaata nalunaarusiaani ullumikkut ataasinngornermi avammut saqqummiunneqartumi tamanna atuarneqarsinnaavoq. Suleqatigiissitat isumalioqatigiissitap ataaniittut Nunatsinni eqqartuussiveqarnerup iluani iluarsisassanut arlalinnik kaammattuuteqarput.
Isornartorsiorneqartullu ilagaat illersuisutut akerisaasut. Taakkumi suliatigut piginnaasaasa unnerluussisussaatitaasut inatsisilerituunik inuttaqakkajuttut piginnaasaannut naleqqiullugit naammaginanngitsutut nalilerneqarmata.
Tamannalu equngasortaqartitsivoq, nunatsinnilu eqqartuussiveqarnermi pitsaasumik illersorneqarnissamik inuttut pisinnaatitaaffigineqartoq ilumut naammassineqarnersoq qularnarluni, suleqatigiissitat nalunaarusiami taama allapput.
Illersuisut piginnaasaasa qaffassarneqarnissaat ilaatigut kaammattuutigaat, illersuisuunerlu saniatigut suliaajunnaartillugu ajornanngippat tamakkiisumik inuussutissarsiutaalersinnissaa kaammattuutigaat.
Isornartorsiorneqartoq alla tassaavoq eqqartuussiveqarfiit sisamaanerat. Eqqartuussissuserisut siunnersuisoqatigiivisa kaammattuutigaat taakku ataasiinnangortillugit kattunneqassasut, taamaaliornikkut eqqartuusivinni aalajangiinerit pitsaassusaasa qaffassarnissaat siunertaralugu eqqartuussivinni suliatigut piginnaasat nukittorsarneqarsinnaassammata.
Inatsisinik atortitsinermut naalakkersuisup Inuit Ataqatigiinneersup Sara Olsvigip danskit inatsisinik atortitsinermut ministeriat Søren Pind decembarip aallartinnerani ataatsimeeqatigisussaavaa.
Namminersornerlu pillugu inatsimmi allaaserineqartutut, eqqartuussiveqarnerup pitsaassusiata qaffassarneqarnissaa Sara Olsvigip ataatsimiinnermi tassani erseqqissaatiginiarpaa, aviisimut Politikenimut taama oqarpoq.
