Inatsisitigut ataataqanngitsut inatsiliunneqalerput
Isumaginninnermut ministerip Karen Hækkerupip Folketingimut ilaasortap Sara Olsvigip apeqquteqaataanut akissutaani tamanna takuneqarsinnaavoq, inatsisitigullu ataataqanngitsut pillugit suliap Danmarkimi oqartussaasunit maanna iliuuseqarfigineqalernera Sara Olsvigip nuannaarutigaa.
- Naak 2011 naareersoq, inatsimmillu siunnersuutissamik suli takusaqanngitsugut, nuannaarutigaara socialministerip akissummini oqaatigimmagu inatsisissatut siunnersuummik 2012-imi upernaap ingerlanerani saqqummiussaqassallutik, Folketingimut ilaasortaq Sara Olsvig oqarpoq.
Inatsisitigut ataataqanngitsut pillugit Danmarkimi Ilaqutariinermut aqutsisoqarfik Rigsombudimut ukiaq attaveqarsimasoq, Sara Olsvigip oqaatigaa.
Inatsisitigulli ataataqanngitsut ataataminnik toqukkut qimaguttoorsimasut qanoq iluuseqarfigineqassanersut suli apeqqutaavoq, ministerillu akissutaani aamma takuneqarsinnaavoq inatsisitigut ataataqanngitsut ataataqarnissaminnut ataatartillu pillugu paasissutissanik pinissaminnut pisinnaatitaaffeqartut. Sara Olsvig naapertorlugu tamanna alloriaruvoq annertooq.
- Suli suliassaqarpugut kisianni una alloriarneq pingaaruteqartorujussuusutut nuannaarutissaasutullu uanga isumaqarpunga oqaatigineqarsinnaasoq, Inuit Ataqatigiit sinnerlugit Folketingimut ilaasortaq Sara Olsvig oqarpoq.
