Peqqinnissaqarfimmi kukkunerit meeqqat toquneranut attuumassuteqanngitsut, Agathe Fontain isumaqarpoq.

Peqqinnissaqarfimmi kukkunerit toqumik kinguneqartartut pillugit Peqqissutsimut Naalakkersuisup qanoq iliuuseqarfiginiarnerai, Demokraatineersup Bjørk Lange Olsen paragraf 37 atorlugu Agathe Fontainimut (IA) sapaatit akunnerat kingulleq apeqquteqarmat, allakkatigut akissuteqarnermini taama nipeqarpoq.

Peqqinnissaqarfimmi kukkunerit toqumik kinguneqartartut pillugit KNR allaaserinneqattaareersoq, MIO-llu nalunaarusiai sapaatit akunnerisa siulianni saqqummiunneqareerneranni Bjørk Lange Olsen peqqissutsimut naalakkersuisumut apeqquteqarpoq.

Demokraatit peqqissutsimut tunngasuni oqaaseqartartuata arnamit akisussaafferujussuarmik tigumminnittumit akissutigineqartut naammagisimaanngilai.

- Akissutit toqqissinarsinngillat. Taakkua ajornartorsiutinik ilumoorussinermik sulinissamillu nalunaarutit akerlerluinnaraat, Bjørk Lange Olsen oqarpoq nangillunilu:

- Taama ittumik akissuteqaraanni oqarlunilu, suliani aalajangiisoqarsimanngitsoq, taava toqumik kingunilimmik kukkusoqarsimanerani miserratiginninnertut nipeqarpoq, taanna oqarpoq.

Inatsisilerinerup tuanuani toqqoqqasoq

Agathe Fontainip Bjørk Lange Olsenimut akissutimini Peqqinnissaqarfiup maalaarutinik aalajangiisarfianut innersuuppaa. Agathe Fontain (IA) naapertorlugu allakkatigut akissuteqarnermini ukiuni kingullerni napparsimasut maalaarutaannik aalajangiisartuni, meeqqat kukkusumik katsorsarneqarnerup kinguneranik toqusoqarsimaneranik Naalakkersuisut ilisimanninngitsut oqaatigaa.

Naak meeqqat kukkusumik katsorsartinnerat toqumik kinguneqartoq MIO-p nalunaarutaani allassimagaluartoq.

Demokraatit peqqissutsimut tunngatillugu oqaaseqartartuata erseqqissaatigaa apeqqutini sulianut aalajangersakkanut tunngasut apeqqutigineqanngimmata, kukkunerilli kinguneranik toqusut qanoq iliuuseqarfiginiarnerai apeqqutigineqarlutik:

- Isumaqarpunga suliani aalajangiiffigineqartussani, paragrafini inatsisilerinerullu tunuani toqqoqqavallaartoq. Taamaaliornerlu pitsaanerpaasorinngilara, taanna oqarpoq.

Agathe Fontainip (IA) Paragraf 37 atorlugu akissutaa Bjørk Lange Olsenip (D) paasiuminaatsippai.

Peqqissutsimut naalakkersuisup KNR-imiit sapaatit akunnerisa siulianni apersorneqarnermini ilaatigut ima oqarmat: "Kukkusoqartarsimanera kukkusoqartarnera taanna aamma miserratigineqarnikuunngilaq."

- Meeqqat toqussutigisaanik kukkusoqartarsimasoq tamatta isumaqatigiissutigisinnaagutsigu, taava maalaarutinik aalajangiiffioreertoqartariaqaraluarpoq, nassuerutigineqarluni, kukkusoqarsimasoq, angajoqqaallu ikiorneqarlutik ikorfartorneqassasut, Bjørk Lange Olsen oqarpoq nangillunilu:

- Aalajangiiffigineqarsimasunik maalaaruteqanngitsoq aalajangiusimagaanni, taava maalaarfissat, taakkualu qanoq suliarineqartarnerat, ajoquteqarsimassapput, taanna oqarpoq.

Misissuisoqassanngitsoq

Naalakkersuisut Peqqinnissaqarfiup toqumik kinguneqartumik kukkunerisa kinguneratigut misissuinissamik eqqarsaateqarnersut, Bjørk Lange Olsen paragraf 37 atorlugu peqqissutsimut naalakkersuisumut aperivoq.

Peqqissutsimut naalakkersuisoq KNR-imiit apersorneqarami ilaatigut ima oqarmat: ”Suliat imaannaanngitsuupput. Kisianni suliassaapput aamma sulinissarput taanna qilanaaraarput aaqqitassanik aamma isigaluta aaqqiinissarput siunertarigatsigu”

Paragraf 37 atorlugu allakkatigut akissuteqarnermini nunatta nakorsaaneqarfianut innersuuppaa oqarlunilu misissuininernik aallartitsinissamik eqqarsaateqarani. KNR-imiit Agathe Fontain (IA) apersorneqarami ilanngullugu oqaatigaa: ”Ajuusaarutigeqaara. Neriuutigivara siunissami taamatut pisoqaqqissanngitsoq.”

Bjørk Lange Olsenilli isumalluarnartoqartinngilaa:

- Iluatsitsinissaarsuaqariataarneratigut taama kukkusoqaqqinngitsoorsinnaavoq. Siunissamili kukkunernik nalaataqaqinnissamik isumalluassanngitsugut isumaqarpunga, Bjørk Lange Olsen oqarpoq.

KNR-imiit Agathe Fontain apersorniaraluarparput. Maannamulli iluatsissinnaasimanngilarput.