Inatsisartut meeqqat illersorneqarnerulernissaat tapersersorpaat
Taamaalillugu meeqqat inuusuttullu illersorneqarnerat Naalakkersuisut pitsaanerulersikkusuppaat.
Inatsimmut allannguutissatut siunnersuutip siullermeerluni suliarineqarnera sivisunngilaq, tassami Partiit tamarmik allannguutissamut isumaqataammata.
Allannguutissallu aappassaanik suliarineqartinnagu ataatsimiisitaliamut suliassanngortinneqassasoq Partii Naleqqamit siunnersuutigineqapoq.
- Meeqqat inuusuttullu kinguaassiuutitigut allatigulluunniit pinerluffigineqarsimasut killiisiunerni eqqartorneqartuni ilisimannittutut pinerlineqarsimasutulluunniit apersuinermi peqaataatinneqarsimasut tamarmik piaarnerpaamik tarnip pissussaanik ilisimasalinnik sullinneqartarnissaat sulissutigineqartassasoq pisortaniit isumagineqartariaqartoq piumasaqaatigaarput, Anthon Frederiksen oqarpoq.
Aamma atuaruk Meeqqat inuusuttullu pitsaanerusumik illersorneqartalissapput
Inuit Ataqatigiit inatsimmut allannguutissaq aamma isumaqataaffigaat. Meeqqat inuusuttullu illersorluarneqarsinnaanngussammata.
Meeqqat pinerluttuliornernit ilungersunartunit nalaanneqaraangata, tamanna meeqqamut misigisaminik eqqartuussivimmi inunnik takornartanik ulikkaartumi oqaluttuarsinnaanissamut sakkortusinnaavoq. Taamaattumik video atorlugu nassuiaateqarsinnaanissaq eqqartuussivimmi apersorneqarnissamik pinngitsuuitissasoq, meeqqanut oqinnerusussaavoq.
Meeraq pasineqartorlu
Apersuinermi nalinginnaasumi unnerluussisoq aamma illersuisoq uppernarsaasumik apersuinissamut
periarfissaqartarput. Taamaaliornikkullu meeraq aammalu pasineqartoq tamarmik eqqarsaatigineqassapput.
Inatsimmut allannguutissatut siunnersuutip partiinit tapersorsorneqarnera Inatsisinik atuutitsinermut Naalakkersuisup Mala Høy Kukóp nuannaarutigaa.
Oktobarup 22-ani inatsimmut allanngutissatut siunnersuut aappassaaneerneqassaaq.
