Meeqqat inuusuttullu pitsaanerusumik illersorneqartalissapput
Taamaattumik meeqqat video atorlugu apersorneqarsinnaasut 15-inik ukiulinnut qaffanneqarnissaanik Naalakkersuisut siunnersuuteqarput.
Inatsisissatut siunnersuummi siunertaavoq meeqqat inuusuttullu ilungersunartumik pinerluttuliornermi eqqugaasimasutut imaluunniit isiginnittuusimasutut ilimagineqartut illersorneqartarnerisa pitsaanerulersinneqarnissaat.
Naalakkersuisut siunnersuutigaat tamanna meeqqap qaqugukkut video atorlugu apersorneqartarneranut ukiut killissaliussat ukiunit 12-iniit 15-inut qaffatsinnerisigut pissasoq, pisunilu immikkut ittuni ukiut killissaliussat 18-inik ukiulinnut qaffatsinneqarsinnaallutik.
Meeqqat inuusuttulluunniit eqqartuussivimmut ornigunnatik
Video atorlugu apersuineq tassaavoq, meeraq imaluunniit inuusuttoq pinerluttulerinermut suliani misissuinerup nalaani video atorlugu immiunneqartumik apersorneqarnera meeqqallu imaluunniit inuusuttup eqqartuussivimmut ornigulluni tassani apersorneqarnissaanut taarsiullugu eqqartuussinerup nalaani uppernarsaatitut takutinneqartussaq.
Video atorlugu apersuineq toqqissisimanartumi atugassaqartitsiviusumi immikkut ilinniarsimasumit apersorneqarnerussaaq, politiinut nalunaarutiginninnerup kingorna sapinngisamik sukkanerpaamik, ingerlanneqartussaq.
Inatsisinut ataatsimiititaliap siunnersuut iluarisimaarpaat
Inatsisartut ukioq kingulleq upernaakkut ataatsimiinnerminni pinerluttulerinermut inatsisip eqqartuussisarnermullu inatsisip allanngortinnerani ilanngullugu meeqqat video atorlugu apersorneqartarnerannut malitassat allanngortippaat.
Taamani inatsisinut ataatsimiititaliap siunnersuut iluarisimaarpaat, ukiulli killiliussat 15-inut ukiulinnut killeqartinneqartariaqaraluartut oqaatigalugu.
Maannalu, ukioq ataaseq affarlu qaangiuttut, siunnersuut inatsisinut ilanngutsinniarneqalerpoq.
Siunnersuut ullumi siullermeerlugu suliarineqassaaq.
