Inatsisartuni pingasunngornermi pisussat
Inatsisartuni ullut ataatsimiiffiusut 21-ssaat ullup qeqqanut ammarneqassaaq ullormullu oqaluuserisassani immikkoortut aqqaneq-marluupput.
Taakkunannga qulit pingajussaaneerinerussapput, taamaattumillu annerusumik oqallittoqarnissaa naatsorsuutigineqanngilaq.
Oqaluuserineqartussaq siulleq tassaavoq Oqaasiliortut kalaallisut oqaatsinik, oqariartaatsinik aamma oqaasilioriaatsinik nutaanik oqaasersianillu katersuisarnerannut nalunaarsuisarnerannullu allannguutissanut tunngasoq.
Oqaasiliortut taamaalillutik kalaallisut oqaatsitta malinnaaviginissaannik nalunaarsornissaannillu siunissami taamaallaat suliaqalissapput kalaallisullu oqaatsit nutaat, oqaatsit ilusaat oqariaatsillu akuerisarunnaassallugit. Tamannalu Inatsisartuni tapersersorneqarpoq.
Tamanna pereerpat Nunat Aqqanik Aalajangiisartut pillugit inatsimmut allannguutissaq akuersissutigineqassaaq, aalajangiisartuni ilaasortat piginnaasaqarnissaannik piumasaqaat inatsimmut ilanngunneqassalluni.
Doris Jakobsenip erseqqissaatigaa Nunatta nunat aqqi pisuussutigigai Nunallu Aqqinik Aalajangiisartut pillugit inatsisip nutarteriffigineqarnissaa sukateriffigineqarnissaalu inassutigalugu, taamaaliornikkut aalajangiisartut sulinerisa aaqqissuussasumik piffissamullu naleqquttumik tunngavissaqarnissaa qulakkeerumallugu.
Imaani avatangiisinut inatsisip nunani tamalaani inatsisinut atuuttunut naapertuuttunngortinnissaa tulliullugu oqaluuserineqassaaq. Upalungaarsimaniarnermut mingutsitsinermillu nakkutilliinermut malittarisassat sukaterneqarnissaat ilaatigut tamatumani pineqarpoq.
Aamma peqqussut nutaaq, innuttaasut killilimmik sulisinnaassusillit suliffeqarnermut attaveqaaannarnissaannik qulakkeerinnittussaq akuersissutigineqartussaavoq.
Tamanna pereerpat, akileraartarnermut inatsimmi malittarisassat arlallit sukarteriffigineqarnissaat oqaluuserineqassaaq NunaOilillu suliaqarneranik annikillisaanissamik siunnersuut aamma akuersissutigineqassalluni.
Imigassanik kimittuunik kimikittunillu nioqquteqarmi ammasarfiit sivitsorneqarnissaannik siunnersuutip ukiakkut ataatsimiinnermi saqqummiunneqarnissaa innersuussutigineqarpoq, imigassat pillugit inatsimmut maannamut atuuttumut tamarmiusumut ilanngullugu suliarineqarniassammat.
Nunat Avannarliit Killiit Siunnersuisoqatigiiffiata Savalimmiuni, Nunatsinni Islandimilu nunarsuarmi sumi inissisimanertik tunngavigalugu nunat tamalaat akornanni naalakkersuinikkut ingerlatsinerup silarsuaani nutaami nunat pineqartut inissisimanerata oqallisigineqarnissaa siunertaralugu ataatsimeersuartitsisoqarnissaa siunnersuutigaa, tamannalu Inatsisartuni partiit akornanni tapersersorneqarpoq.
Ullormullu oqaluuserisassani kingullertut ippassaq immikkoortoq ullumimut kinguartinneqartoq, qimmussertarnerup nukittorsarneqarnissaa pillugu apeqquteqaat aallaavigalugu oqallisissiatut siunnersuut oqaluuserineqassaaq.
