VIDEO Imminut illersorniarluni nannut aatsaat taama amerlatigisut toqunneqartariaqarsimasut
Pinngortitaq pillugu nunarsuaq tamakkerlugu suliniaqatigiiffiup WWF-ip nalunaarusiaani nutaami atuarneqarsinnaavoq nannut aqqaneq-marluk ukiormanna qaammatit qulingiluat siulliit ingerlaneranni imminut illersorniarluni aallaaneqartariaqarsimasut.
- Aatsaat taama amerlatigisut aallaallugit toqunneqartariaqarsimapput tamannalu silap pissusiata allanngoriartornerata malitsigaa, Pinngortitaq pillugu nunarsuaq tamakkerlugu suliniaqatigiiffimmi issittumi uumassussilerisoq Charlotte Moshøj oqarpoq, taanna nalunaarusiamik suliarinnittuuvoq.
Immap sikuata aakkiartorneratigut nannut sivisunerusumik nunamiittarput sikumilu piniarniartarnerat sivikillilluni.
Nannut perlililersut nujuarpallaarunnaarsimallu
- Nannut amerlasuut inuit najugaqarfigisaannukartarput, taakkua perliliivittarput inunnullu nujuarpallaarunnarsimallutik nerisassaminnik nassaarniarlutik inuit najugaqarfiannut pisarput.
Illoqqortoormiuni nannut sapaatip akunnerata ataatsip ingerlanerani arlaleriarlutik illoqarfimmut qanillatunngikkunik illoqarfimmut pisarput.
Puisit aamma aarrit neqaat qimminut nerukkaatissatut nivinngaassukkat illigalugit nannut Illoqqortoormiunut qanillattunngikkunik illoqarfimmut pisarput.
Nannut qimminut nerukkaatissanik neriniarsarisut imaluunniit illugisap eqqaani angalaarpata taakku aallaallugit toqunneqarnissaanut pisinnaatitaaffeqartoqanngilaq, Charlotte Moshøj oqarpoq taassuma erseqqissaatigaa - nannuttassanik ukiut tamaasa pisassiisoqartarmat piumasarineqartullu naapertuuppata akuersissutinik pisoqarsinnaasoq.
- Nannumit upanneqaruitt aallaasinnaavat taava tamatuma kingorna akuersissummik qinnuteqassaatit, Pinngortitaq pillugu nunarsuaq tamakkerlugu suliniaqatigiiffimmi uumasussilerisoq Charlotte Moshøj oqarpoq.
