Imaatigut kabeli qajannaarneqaqqippoq
Kabeli taaguuteqartinneqartoq Greenland Connect siunissami sikunit akornuserneqarnissaminut upalungaarsimalerpoq.
Suliaq robotit atorlugit ingerlanneqarpoq, tamannalu suliani taama ittuni siusinnerusukkut misilinneqarsimanngitsoq, TELE POST nalunaarpoq.
Suliat taamaattut suliarineqartillugit nalinginnaasumik aqqartartut immap naqqani sullulianut kabelinik ikkussuussisaraluarput, Nuulli kangerluani sikut sermimit uukkartartumeersut ilaatigut 170 meterimik itsineqartigisarmata, maanna Kalaallit Nunaanni immap naqqani sulluliat nutaat 209 meterimik ititigisumiipput, taamaalillutillu sikunut angisuunulluunniit ingalassimatinneqalerlutik.
Immami taama ititigisumi aqqartartut sulisinnaanngillat, taamaattumik roboti atorneqartariaqarsimavoq.
- Immap naqqani suliaqarnermut atatillugu oqaluttuarisaanermi aatsaat siullermeersumik roboti atorneqarpoq. Teknikki taanna atorneqarsimanngisaannarpoq, taamaammallu immikkut peqqissaarullugu piareersarneqartariaqarsimalluni,
TELE-POST-ip teknikkikkut pisortaa , Jørn Jespersen oqarpoq.
TELE-POST suliami siuttuuvoq niueqatigisartakkani nunani allaneersut, nunatsinneersullu suleqatigalugit . Kikkut tamarmik ikioqatigiinnerisigut suliaq iluatsissimavoq.
-TELE-POST-imit nuannaarutigeqaarput suliaq unammillernartoq angisoorlu iluatsittumik naammassimmat, Teknikkikkut pisortaq oqarpoq.
Sulluliat taakku marluk 1165 meteriusut, aasaq Sanap avataaniit Nuup kangerluanut ingerlasut qillerneqarput. Sullulianut ruujorit savimernit issusuut inissinneqarsimapput. Sulluliap aappaa New Foundland-imut, Canada-miittumut attaveqarpoq, aappaatalu Nuuk Qaqortoq aamma Island attaveqaaserlugit.
Imaatigut kabelip suliarineqarnera Kalaallit Nunaanni atuisut malugisimanngilaat, attaviummi aappaata suliarinerani attaveqarneq kabelip aappaanut nuunneqartarmat TELE POST tusagassiuutinut nalunaaruteqarluni tamaatut allappoq.
