Qimmit nappaataata Ilulissanut anngussimanissaa aarleqqutigineqartoq
Qeqertami qimmit qimmit nappaataannik ukiup massuma ingerlanerani nappaalanerat pissutaalluni qimmerpassuit toqupput, kommunilu maanna sukannersumik immikkullu ittumik iliuuseqalersaarluni:
- Qimmit pigisat taamaammat pitussimassapput, qimmillu angalaannartut ataasinngorpamiit toqunneqartalissapput, Søren Lindenhann, Qaasuitsup Kommuniani teknikkeqarnermut avatangiisinullu akisussaasoq oqarpoq.
Aamma atuaruk Qeqertami qimmit 70-it toqunneqartariaqartut
Ilulissani qimussimik sukkaniuttoqarmat qimmit pigisat Qeqertameersut peqataapput. Qimmit taakku qimminut pigisanut allanut qanillattornaveersaartinneqartut Qaasuitsup Kommunia sinnerlugu ingerlatsisup oqaatigaa, qimmillu qimmiliviit eqqaanniittut kingorna toqunneqartariaqarsimasut oqaatigalugu.
Qimmip nappaataata malunniutai
Virusi timip ipiutaasartai tamaasa siammarfigigaangamigit nappaat malunniutilersarpoq. Qimmeq ullut pingasut angullugit 39,5-40,5 gradinik kissarneqalersarpoq.
Kingorna kissarneerukkiartortarpoq, nalinginnaasumik kissarneqalersarluni. Ullut marluk qaangiukkaangata kissarneqaqqilersarpoq, bakteriat napparsimalersitsisuullutik.
Uku malunniutaasinnaallutik:
- Nerisassanik nakerisaqannginneq
- Isinit qingamillu qorsuppaluttumik seerineq
- Meriarneq timminnerlu
- Panertoorneq
- Quersorneq/ bronkitis/puallunneq
- Isigai sigguilu issutsinneri
Naalakkersuisut
Qimmillit qimmitik taamaammat maannamit pitussimatissagaat kommunip illoqarfimmi allagarsiivinni tamani allagarsiissutiginiarpaa. Qimmeqatigiit qimmiliviit qimassanngilaat, angalaannartullu ataasinngorpamiit toqunneqartalissapput.
Aamma atuaruk VIDEO Qeqertarmiut Avannaata Qimussersuanut peqataanngitsuulersut
Kommuni qimminik toqoraasartumik ataatsimik tunngaviusumik peqarpoq, marlulli allat ulluni tulliuttuni aamma sulitinneqassapput, qimminik pigisanik nakkutiginninnissaat siunertaalluni.
Qimmit nappaataannut akiuussutissat maanna ikittuinnaasut Søren Lindenhannip ilanngullugu oqaatigaa, qimmimmi Qeqertami nappaalalermata akiuussutissat amerlanerit Qeqertamut ingerlateqqinneqarmata. Qimmilli nappaataannut akiuussutissat nutaat uumasut nakorsaata inniminnereerpai, taakkulu Ilulissanut poorskip kingorna anngunnissaat naatsorsuutigineqarpoq.
- Illoqarfik taamaammat akiuussutissanik naammattunik peqarpoq, pisariaqalissappat atorneqarsinnaasunik, Søren Lindenhann oqarpoq.
Qimmilli nappaataata tuniluutilersinnaanera mianersoqqussutigaa. Immikkullu iliuuseriniakkat ataqqineqarnissaat pingaaruteqartoq erseqqissaatigaa. Nappaatip qimussit aqqutaasigut tuniluussinnaanera assersuutigaa.
- Tassa imaappoq. Qimmit nappaateqanngitsut qimussit aqqutaasigut ingerlaarpata qimmit nappaataannik nappaateqalersinnaapput, Søren Lindenhann, Qaasuitsup Kommunianeersoq oqarpoq.
