Ilulissat Kangianni illorsuassamut isumalluartoqartoq

Ilulissat Kangianni illorsuassap qanoq isikkoqarnissaa inuiattut ullorsiorfimmut atatillugu saqqummiunneqarpoq.

Ajugaasullu tassaapput illuliassanik titartaasartoqatigiit, Dorte Mandrup arkitekter. Ajugaanerallu tupinnartoq, Dorte Mandrupip oqaatigaa.

- Ajugaalluni nuannertuaannarpoq. Unamminermili eqqarsarpugut una uagutsinnut suliassanngortinneqassappat, suliassarisassatsinnit tamanit anginerpaajussasoq, Dorte Mandrup oqarpoq.

Ajugaasullu titartaanerminni, illorsuassap avatangiisinut tulluartuunissaa pingaartilluinnarsimavaat.

Aamma atuaruk Ilulissat Kangiat pillugu Ilisimatusarfittaassaq piviusunngoraluttualersoq

Aamma atuaruk Sermermiuni illorsualiortoqassaaq

Alutornarlunilu akikitsoq

Naliliisulli illorsuassap ilusilersorneqarnera kisiat isiginiarsimanngilaat.

- Toqqagarput pissanganartuuvoq, aamma maani sanaartugassanik suliassinneqartartut suliarisinnaavaat, imaanngitsoq nunanut allanut suliariteriarlugu maannga nassiullugu. Aamma ilaminit akikinnerugami isikkualu alutornarluinnaqqissaarluni, Namminersorlutik Oqartussat naliliisuni sinniisuat, Thue Christiansen taama oqarpoq.

Tulluusimaarutissaq

Ilulissat takornariaqarfissuuvoq, takornariallu Ilulissanukartartut amerleriarnissaat siunertaalluinnarpoq. Borgmesterilu Ole Dorph isumallualereerpoq.

- Uaguulluni assut nuannerpoq. Illoqarfiup, Kommunip Nunattalu ukiuni aggersuni tulluusimaarutissaannik illorsuarmik massakkut sanasoqarnialinnguatsialerpoq, Ole Dorph oqarpoq.

Aamma atuaruk Isjordcenterimut tapiissuteqarneq Qaasuitsup kommuneani nuannaarutigineqartoq

Silap pissusaanut oqallinnermi nunarsuarmi illoqarfiit pingaarnersaat

Illorsualiornissaq ukiuni 20-ngajanni sulissutigineqarsimasoq, borgmesterip oqaatigaa. Suliniullu aningaasaateqarfimmit Realdaniamit tapersersorneqarneratigut maanna piviusunngortinneqarsinnaanngorpoq. Ilulissallu kangianni illorsuassaq periarfissaqarluartoq, aningaasaateqarfimmit isumaqartoqarpoq.

- Nunat arlarlit siuttui tassunga takuniaasarput. Tamaani silap pissusaa pillugu unammillernartut namminneerlutik takusinnaassammassuk. Taamaaliuninnartariaqarpullu. Kisianni aamma illoqarfimmi najugaqartut takunnissinnaaffiannik, ilisimatuut inerniliussaminnik avitseqatigiiffigisinnaasaannik, takornariallu silap pissusaanut ilisimasaqarnerulerfigisinnaasaannik sanasinnaassagutta takorluulaaruk. Taama ittumik sanasinnaassagutta Ilulissat silap pissusaanut oqallinnermi illoqarfinni pingaarnerpaanngorsinnaavoq, Realdaniami pisortaaneq, Jesper Nygård oqarpoq.

Ilulissat kangianni illorsuup 2020-imi naammassinissaa naatsorsuutigineqarpoq.

Aamma atuaruk Realdania Ilulissat kangerlua pillugu illorsuassamut 75 millioninik aningaasaliivoq