Illersornissaqarfik Folketingimit amerlanerusunik aningaasaliiffigineqartoq

1,5 milliardit koruunit suliassaqarfimmut ilassutitut aningaasaliissutigineqarput, 3 milliardit koruunillu illersornissamut missingersuutini suliassaqarfimmit allamit nuunneqarlutik.

Danmarkip taamaalilluni nunap BNP-ata 1,5 procentia illersornissaqarfimmut atorpaa. Taamaaliornikkullu  USA-p præsidentiata Donald Trumpip nunat ilaasortaasut illersornissamut BNP-mik 2 procentianik atuinissaannik piumasaqaataanut qaninnerulerpoq. Trumpip taama piumasaqaateqarnini Europami nunanut NATO-mut ilaasortaasunut arlalinnut attattuarsinnarpaa.

AAMMA ATUARUK Trumpip NATO-mi iligiit isornartorsiorai

Sermitsiarlu naapertorlugu Dansk Folkepartiip Radikale Venstrellu ilassutitut aningaasaliissutigineqartut ilaasa Issittumi suliassanut atornissaat kissaatigaat, pingaartumik nakkutilliinermut imaatigullu annaassiniarnermut.

- Upalungaarsimaniarnerup nukittorsarneqarnissaa pisariaqarpoq, annaassiniarnermut kiisa aamma silap pissusianut avatangiisinullu tunngatillugu. Sillimaniarnermut silallu pissusia pillugu ilisimatusarnerit nukittorsassavagut, aamma imaassinnaavoq Issittumi Sakkutooqarfiup naammassisinnaasai umiarsuarnik allanut aamma atorneqarsinnaasunik nukittorsarneqassasut, nunanut allanut tunngasunut ministeriusimasoq Radikale Venstremeersoq, Martin Lidegaard, Sermitsiamut taama oqarpoq.

Illersornissaq pillugu Folketingimi nutaamik isumaqatigiissuteqartoqarnerata kingorna ukioq ataaseq qaangiutiinnartoq taama isumaqatigiissuteqartoqarpoq. Illersornissaqarfimmut aningaasaliissutit taamani ukiut arfinillit ingerlanerini 12,8 milliardit koruuninik aningaasaliiffigineqarpoq.

USA-lli Danmarkimi aallartitaata, Carla Sandersip, aviisimut ullormut saqqummersartumut Børsenimut oqaatigaa ilassutitut aningaasaliissuteqartoqaraluartoq Danmarkip BNP-mi 2 procentianik illersornissamut atuinissaanut suli naammanngitsut.