Folketingip Kukkunersiuisui: Timmisartut sorsuutit naatsorsuutigisamit ajornerupput
Jyllands-Posten taama allaaserisaqarpoq.
Folketingip Kukkunersiuisuisa naatsorsuineri naapertorlugit, naatsorsuinerit Folketingip timmisartunik sorsuutinik F-35-nik nutaanik 27-nik pisinissamut akuersissuteqarnerannut tunngavigineqartut annertuupilussuarnik kukkuneqarput.
Ilaatigut timmisartut nalunaaquttap akunnerini qanoq amerlatigisuni ingerlaarsinnaanerannik Folketingimut paasissutissiissutigineqartutut ingerlaarsinnaannginnerat, Folketingip Kukkunersiuisunit uparuarneqarpoq.
AAMMA ATUARUK Illersornissamut ministerip qulimiguullit isornartorniorneqarsimaqisut illersorpai
Timmisartunik sorsuutinik pisineq 66 milliardit koruuninik naleqartoq naalagaaffiup pisiortugaasa akisunersaraat. Aningaasallu taama amerlatigut atorlugit pisinissaq Folketingip Aningaasaqarnermut ataatsimiititaliaani ungasinngitsukkut inaarutaasumik akuersissutigineqartussaavoq.
Timmisartunik sorsuutinik F-35-nik pinissaq siornatigut aamma sakkortuumik isornartorsiorneqareerpoq, ilaatigut partiimit naalakkersuisuutitaqartumit Konservative Folkepartimit. Naatsorsuinerit aalajangiiffigisassatut siunnersuummi tunngavigineqartussat isumaqataaffiginagit partiip isumaqatigiinniarnerit peqataaffigiunnaarsimavai.
Timmisartut issittumi atorneqarsinnaanerat qularnartoqartillugu siornatigut aamma oqaatigineqarsimavoq.
AAMMA ATUARUK Sorsuutit pillugit aaliangerneq isorineqartoq
Naalagaaffiup Kukkunersiuisui - Folketingip Kukkunersiuisuisa nalunaarusiaat tunngavigalugu - Illersornissamut ministereqarfiup naatsorsueqqinnissaanik noqqaassuteqarput.
- Folketingip aalajangissavaa paasissutissanik amerlanerusunik pissarserusunnerluni imaluunniit ilaannakormik tunngaveqartumik pisisoqassanersoq, Naalagaaffiup Kukkunersiuisuisa siulittaasuat, Peder Larsen (SF), Jyllands-Postenimut taama oqarpoq.
