Illersornissaq pillugu isumaqatigiinniarnerni nunarput peqataatinneqassanngitsoq
Danskit naalakkersuisuisa Illersornissaqarfiup issittumi suliassai pillugit nalunaarusiaata ataasinngormat saqqummiunneqarnerani danskit illersornissamut ministeriat Peter Christensen taama nalunaarpoq.
- Kalaallit aamma savalimmiormiut folketingimut ilaasortaatitaat ataatsimeeqatiserissamaarpakka, isumaqatigiinniarnerilli illersornissaq pillugu isumaqatigiissuteqartut kisimik peqataaffigissavaat.
Aamma atuaruk Sakkutuuleeqqinngikkaluarluni illersornissakkut nukittorsaasoqassasoq
Inuit Ataqatigiit Siumullu Folketingimut ilaasortaatitaasa isumaqatigiinniarnerni Nunatsinnut Savalimmiunullu sunniuteqartussani atlantikup avannaamiut politikeriisa peqataatinneqartannginnerat pillugu danskit naalakkersuisui Venstremit siuttuuffigineqartut aamma naalakkersuisut siulii Thorningip siuttuuffigisai arlaleriarlutik isornartorsiorsimavaat.
Tamatumani ilaatigut politeeqarneq pillugu isumaqatigiissuteqarneq, aningaasanut inatsisissaq pillugu isumaqatigiinniarnerit danskillu sakkutuuinik sorsuffimmut aallartitsinissamik isumaqatigiissutit pineqarput.
Nunatsinni Savalimmiunilu naalakkersuisut Illersornissaqarfiup issittumi suliassai pillugit nalunaarusiortoqarneranut atatillugu qanittumik suleqataatinneqarsimasut nunanit pingasuusunit oqaatigineqarpoq.
Nalunaarusiaq uani atuarneqarsinnaavoq: Illersornissamut ministereqarfiup Issittumi siunissami suliassai pillugit nalunaarusiaq
Illersornissaqarfiulli siunissaata politikkikkut isumaqatigiinniutigineqarnissaa danskit partiivisa akornanniinnaq pissasoq, Peter Christensen erseqqissaavoq.
Illersornissaqarfiulli Issittumi suliassai pillugit tamanut ammasumik tusarniaasoqarumaartoq illersornissamut ministerip ippassaq nalunaarutigaa.
