Sakkutuuleeqqinngikkaluarluni illersornissakkut nukittorsaasoqassasoq
Tassa illersornissamut ministeriup Peter Christensenip Illersornissaqarfiup Issittumi suliassai pillugit nalunaarusiaani ippassaq saqqummiunneqartumi pingaarnertut anguniagassatut taakkartugai.
Tusagassiortunik Københavnimi katersortitsinermi saqqummiunneqarpoq, nunanullu allanut tunngasunut naalakkersuisoq Vittus Qujaukitsoq aamma najuuppoq, Savalimmiormiullu Danmarkimi sinniisuutitaat Sigmundur Ísfeld aamma peqataalluni.
Illersornissamut ministerip oqaatigaa Illersornissaqarfiup nammineq innersuussutai Issittumi suliassat pillugit nalunaarusiami ilaatinneqartut, soorlu aamma Danmarkimi naalakkersuisut Issittumi suut immikkut aallunneqartariaqartutut naliligaat ilaatinneqartut. Sakkutuuleeqqiinerussanngitsorli erseqqissaatigaa.
Aamma atuaruk Illersornissaqarfiup issittumi suliassai pillugit nalunaarusiaq saqqummiunneqartoq
Kalaallit Nunaanni innuttaasut Illersornissaqarfiup Issittumi suliaanut peqataatinneqarneruniarnerat nalunaarusiami innersuussutigineqartuni pingaarnernut ilaasut Vittus Qujaukitsup oqaatigaa, nammineq kajumissutsiminnik upalungaarsimasussat taakkununnga ilaallutik.
Kalaallinik kajumitttumik upalungaarsimasussanik pilersitsisoqarnissaa Kalaallit Nunaannit pingaartinneqarsimasoq Qujaukitsup oqaatigaa.
Illersornissaq pillugu Folketingimi partiit 2013-imi isumaqatigiissutaat kingorna nalunaarusiortitsisoqarpoq, suliarlu ukiunik marlunnik kinguaattoqqasimalluni.
Nalunaarusiaq Illersornissaq pillugu nutaamik ukiaru isumaqatiginninniartoqarnissaanut ilaatigut tunngaviliissaaq.
Atlantikup avannaanit Folketingimut ilaasortat isumaqatiginninniarnissanut qaaqqusaassapput, isumaqatigiinniutivinnissanulli peqataassanngitsut, Illersornissamut ministerip Peter Christensenip tusagassiortunik ippassaq katersortitsinermi erseqqissaatigaa.
Nalunaarusiaq uani atuarneqarsinnaavoq: Illersornissamut ministereqarfiup Issittumi siunissami suliassai pillugit nalunaarusiaq
