Ilisimatuutut misissuiffik nutaaq meeqqat inuusuttullu sammivaai
Meeqqanut, inuusuttuaqqanut ilaqutariinnullu tunnagsumik Ilisimatusarfik siullerpaaq maanna pilersinneqartussanngorpoq. Tamanna Ilisimatusarfimmi 'BUFFI'-mik taaguuserlugu aallartinneqassalluni.
- Meeqqat, inuussuttuaqqat ilaqutariillu pillugit ilisimatusarnerit imaaginnavipput. Tamakkuli sumi atuarneqarsinnaaneri imaaliallaannaq nassaarineqarsinnaanngillat. Maannali tamakku nassaarineqarsinnaalissapput maani Ilisimatusarfimmi inimi ataatsimi, lektori centerissamilu pisortassaq, Jette Rygaard oqarpoq.
Aamma atuaruk Ilisimatusarfik nutaamik periusissiortoq
Ilisimatusarnerit inerneri nassaariuminaasinnaasartut maanna BUFFII-p pilersinneqarneratigut pissarsiariniartarneri ajornannginnerulissasoq, taamatullu tamakku inuiaqatigiinnit imaaliallaannaq atuarneqarsinnaanngussasut, Jette Rygaard oqarpoq.
- Ulluinnarni suliarisartakkagut ersarinnerulissapput, inernerilu inuiaqatigiinnit atorneqarsinnaalernissaat kissaatigaarput.
Aamma atuaruk Ilisimatusarfimmi pinngortitamik ilisimatusarsinnaalernissaq sulissutigineqarpoq
Ilimmarfimmi ilinniartut ilinniarnermini atorfissaqartitsineratigut tamanna aamma iluaqusiisinnaasoq, Jette Rygaard oqarpoq aamma suut ilinniartunit atorfissaqartinneqarnersut nassaariuminernerulissasut oqarluni.
- Atuagaateqarfeerannguami allaaserisanik pisariaqartitanik isummersuiffiusinnaasumillu ajornanngitsunnguamik ujarlertoqarsinnaassaaq. Sammisamullu aalajangersimasumik pisariaqartitsisoqarpat allaaserineqarsimasunik ajornanngitsuaqqamik nassaatorqarsinnaalissalluni, Ilisimatusarfimmi lektori centerimilu pisortassaq, Jette Rygaard oqarpoq.
Meeqqanut, Inuusuttuaqqanut ilaqautariinnullu Ilisimatusarfik, BUFFI, pingasunngorpat novemberip 25-ani Ilimmarfimmi siullermeerluni ammaanersiussaaq.
