Ilisimatusarfik nutaamik periusissiortoq

Ilisimatusarnerup siunnersuinerullu Nunatsinni issittumilu inuiaqatigiinnut tamanut ilaqutissanngorlugit nukittorsarnissaannik siunertaqartumik periusissiap nutaap tamanna ilagissavaa.

Aammattaaq Ilisimatusarfiup piginnaanilinnik ineriartortitsinissaq sammineruniarpaa ilinniartullu sulisullu nunanik allanik suleqarnikkut siuarsaavigineqarnissaat sulissutiginiarlugu.

Nutaamik periusissiornermut tunngavilersuutitut inuiaqatigiit ineriartorneranni akissutissanik nutaanik ujartuisoqarnera siulersuisunit oqaatigineqarpoq.

Taamaammat Ilisimatusarfiup siunniuppaa issittumi inissisimanini nukittorsarniarlugu, Nunatsinni ilisimatusarnermi ilinniarnermilu pissarsiarineqartunik tunniussaqarnerunissaq angujumallugu, tusagassiorfinnut nalunaarummi tamanna allaaserineqarpoq.

Periusissiaq nutaaq ilisimatusarfiup 2020-p tungaanut ineriartortinneqarnerani tunaartarineqassaaq.