Ilisimatusarfimmi allagartartaartut akornanni Ilinniartitaanermut Naalakkersuisoq kandidatinngorpoq
Ukioq manna siornamut sanilliutissagaanni allagartartaartut amerlanerupput. Tamannalu Ilisimatusarfimmi immikkoortortaqarfimmi pisortap Gitte Tronheimip taama amerlatigisut kandidatinngormata nuannaarutigeqaa.
- Tassa kandidatinngortut ukioq manna amerlaneruneri aamma qujanartupilussuuvoq aamma neriuppunga siunissami taamak ingerlaannarumaartoq, Gitte Tronheim oqarpoq.
Allangartartaartorlu ataaseq eqimattani immikkuullarissusseqarpoq, tassa Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisunngorlaaq, Nivi Olsen aamma imminut kandidatitut taasinnaanngorpoq. Allagartartaarnermilu saniatigut Ilinniartitaanermut Naalakkersuisutut atorfini ateriarlugu allagartartaartunut tamanut oqalugiarpoq.
- Asasakka ilinniakkaminnik naammassisut, ilinniartitsisut aammalu inuiaqatigut.
Ilinniarnerani sanianiittuarsimasumut naammassineq oqiliallannarpoq
Naalakkersuisoq oqalugiarmat isiginnaartut ilaat, tulluusimaarpaseqaluni malinnaavoq, tassa Nivip inooqataa Nukannguaq Zeeb.
Nivillu ilinniarnerani sanianiittuarsimasup, naammassinera assut oqiliallaatiginerarpaa.
- Oqiliallannaqaaq, uanga aamma ilinniarama, taavalu meerartaarluta ilinniarnitta ingerlanerani, taamaammat oqiliallannartorujussuuvoq qaangiuttoq, Nukannguaq Zeeb oqarpoq.
Suliassaqaqaaq suliniarta
Ilinniarnerminni meeqqiorsimapput, ullormiillu ullormut ulapaarfiusumi aappariittut inuunerminni tapersersoqatigiinnissaq pingaartuusoq oqaatigaa.
- Tassa suliassaqarnaqaaq soorunalimi, aamma inuuneq misigissagaanni inuulluni taava, uagut eqqarsartarpugut inuunitsinni suliniarta, taamaammat tunniusimaqatigiinnissaq isumaqatigiinnissarlu oqaatigeriikkattuut pingaaruteqartorujussuuvoq, Nukannguaq Zeeb oqarpoq.
Nivi Olsenilu ilinniarnermini anguniakkani naammassineranut taamatullu ilinniartoqatini sukataaqatigisimasani tanngassimaarutigeqai.
- Pilluarnartorujussuuvoq aamma nuannaarnarpoq. Ingammik naalakkersuisuulluni anguniagaralugu ilinniartitaanermut qaffassaanissaq, akornaniillunilu isigalugillu qanoq inuit naammassisut pikkoritsigisut, tanngassimaarnartorujuuvoq, Nivi Olsen KNR-mut oqarpoq.
Ataatsikkoortitsineq sakkortooq
Ilinniartitaanermut Naalakkersuisoq kandidatinngortoq, taamatullu meeqqanut marlunnut anaanaasoq, ataatsikkoortitsinermini sakkortuumik atugaqarsimanerarpoq.
- Sakkortoorujussuuvoq, amerlasuutigut ingammik suliffeqarneq soorunalimi meeraqarluni. Ataatsikkoortitsilluni sakkortoorujussuuvoq, specialiliorninni suligama, sulereeraangama meeqqat innareeraangata speciali ingerlattarpara qaammatit sisamat taamaliorpunga. Sakkortuvoq kisianni kingunera massakkut takusinnaavarput, Nivi Olsen naggasiivoq.
Qinnuteqarit
Ilinniaqqikkusullutit eqqarsaatigigukku ullumikkut qinnuteqassaatit.
Qinnuteqaatit Ilisimatusarfiup marsip aallaqqaataani tingoreersimasussaagamiuk. Qinnuteqarnissamullu ilitsersuutit Ilisimatusarfiup nittartagaatigut uni.gl-imut iserlutit atuarsinnaavatit.
