Ilinniartitsisut nalilersuinermi akissuteqarniarlutik teknikikkut ajornartorsiorsimapput
Meeqqat atuarfiini iliniartitsisut marluk KNR-imit oqaloqatigineqarput, taakkua apeqqutinik akisassanik akissuteqarsimapput aamma paasiniarneqarpoq sooq taama ikitsigisut akissuteqarsimanersut.
- Meeqqat atuarfiisa nalilersuiffigineqarnissaat pingaaruteqarmat apeqqutit akivakka, eqqarsarpungalu tamanna atorneqarsinnaalluartoq meeqqat atuarfiat ullumikkumut sanillillugu ajunnginnerulerniassammat, Jeppe Frost Jepsen, meeqqat atuarfiisa nalilersuiffigineqarnerannut apeqqutinik akisassanik akissuteqarsimassoq KNR-imut oqarpoq.
Jeppe Frost Jepsen Nuummi atuarfimmi Ukaliusami ilinniartsisuuvoq, Kommuneqarfik Sermersuumilu ilinniartitsisunut sinniisuulluni.
Taassuma suleqatini kaammattorsimavai misissuisitsinermi apeqqutinik akissuteqaqqullugit.
Apeqqutit ammarniarneri ajornartorsiutigisimavaat
Jeppe Frost Jepsenip suleqataasa apeqqutit qarasaasiakkut nassiunneqartut ammarniarneri ajornartorsiutigisarsimavaat, taamaattumillu tamanna aporfiusarsimavoq, Jeppe Frost Jepsen oqarpoq.
Apeqqutit pappialianngorlugit anillatsinneqarsimasinnaagaluarput tamannali iluaqutaasimanngilaq.
Lone Kokholmip, Kangillinnguit Atuarfiani ilinniartitsisuusup, misissuisitsinermi apeqqutit akissuteqarfigisimavai, tamannali ajornaatsuinnaasimanngilaq.
- Aallaqqaammut tunniunneqarmata, nassiunneqarmata, torrutiinnarlugu aallartikkaluarpugut taava kisianni paasivarput teknikikkut assigiinngitsunik akornuteqaqattaartoq, ikerinnarsuarmi uneqattaarluta, taava ilai immaqa taamaattoqarsimassappat aamma allani ilimanarpoq unitsiinnartarsimassagaat, Lone Kokholm KNR-imut oqarpoq.
Akissutit ikikkaluartut avaqqunneqarsinnaanngillat
Ilinniartitsisut amerlanerusut akissuteqarsimanngikkaluartut - akissutigineqartut iluaqutaajumartut Lone Kokholm isumaqarpoq - misissuinerlu allatut ilusilerlugu kissaatiginartinnerullugu.
- Nalileeqqinnermut misissuisut misissueqqissaartullu periuseq ataasiinnaq taanna atoramikku, immaqa aamma naammanngilaq nalileeqqinnissamut tunngavittut atussallugu.
- Kisianni ukua 25 procentiinnaat, tassa sisamararterutaannaat kisimik akisimasut, akissutit aamma taakkuupput allatut ajornartumik tikkuusseqataasariaqartut qanoq ingerlanitsinnik. Avaqqunneqarsinnaagunanngillat, Atuarfik Kangillilluani ilinniartitsisoq Lone Kokholm KNR-imut oqarpoq.
