Ikkarlinneq atuisunut akisusinnaavoq

Umiarsuaatillit Vega Reedereai aamma Royal Arctic Line ullumi Københavnimi ataatsimeeqatigiipput. Tassani Royal Arctic Line ilisimatinneqarpoq Vega Reederei sillimmasiisarfini isumasioreerlugu aalajangertoq ajutoorneq ataatsimut ajutoornertut nalunaarutiginiarlugu. Tamanna aamma Havari Grosse-mik taaneqartarpoq.

- Havari Grosse isumaqarpoq usinik piginnittut umiarsuup usillu annaanniarneqarnerannut aningaasartuutigineqartussat aamma akisussaaqataaffigissagaat – akisussaaqataanermi usit akisunerpaaffissaat najoqqutaralugu naliliisoqartarpoq, Royal Arctic Line-m sullissinermut pisortaq Lars Borris Pedersen oqarpoq.

Tamatuma malitsigisaanik nassiussisut nassiussinermut sillimmasiisimanngitsut immikkut akiligassinneqartussanngorput. Vega Sagittarius suli kaanngartinneqanngilaq taamaammat aningaasartuutit qanoq amerlatiginersut suli nalunarpoq. Royal Arctic Linep aamma oqaatigisinnaanngikkallarpaa tamanna atuisunut qanoq akisutigissanersoq.

- Royal Arctic Linemit ajuusaarutigineqarpoq tamatuma sullittakkanut akornutaasinnaanera, kisianni pisumut sunniuteqarsinnaanngilagut, umiarsuup piginnittua, nunarsuaq tamakkerlugu imarsiornermi inatsisit malillugit oqartussaammat, Lars Borris Pedersen oqarpoq.