Ikiuisussanik pilersitsinissaq nuannaarutigineqarlunilu qularnartoqartinneqartoq
Danmarkimi kalaallinik inooqataanikkut ajornartorsiortunik ikiuisussanik pilersitsisoqartussanngornera Kalaallit Illuutaanni nuannaarutigineqarlunilu qularnartoqartinneqarpoq.
Aarhusimi Kalaallit Illuutaanni pisortap Jørn Holbechip politikkikkut nutaamik misiliisoqartussanngornera nuannaarutigaa.
- Maannamut suliniutaasimasunut allaanerusumik suliniuteqartoqartussanngornera tamakkiisumik tapersersorpara, KNR-imut taama oqarpoq.
Ikiuisussanulli kajumissutsimik suleqataasussat sumit pissarsiarineqassanersut nalorninartoqartippaa. Aamma Danmarkimi kalaallinut isumaginninnikkut annertuunik ajornartorsiuteqartunut ornigullutik ikiuisinissamik suliassaq naammassisinnaaneraat qularnartoqartippaa.
- Inooqataanikkut ajornartorsiornerpaat pineqarmata, kajumissutsiminnik suleqataasussat suliassaq naammassisinnaassaneraat unammillernartuussasoraara, Jørn Holbech taama oqarpoq.
Pisortaq: Ilisimasavut atorsigit
Danmarkimi partiit 2017-2020-mut Satspuljemit aningaasaliissutissat pillugit isumaqatigiissuteqartut aningaasaliissutinit katillugit 36,4 millionit koruuniusunit 18,6 millionit koruunit Danmarkimi kalaallinut inooqataanikkut ajornartorsiortunut ikiuinermut atugassatut immikkoortippaat.
Danmarkimi isumaginninnermut ministereqarfik naapertorlugu ikiuisussat tassaassapput kommunini sulisut kajumissutsiminnillu suleqataasut, kingullertullu taaneqartut "tapersersortiussapput, namminneq siornatigut taamatut inissisimasimasut imaluunniit kalaallit inooqataanikkut ajornartorsiortut inissisimanerannik ajornartorsiutaannillu ilisimasaqartut.”
Taamatulli suliaqarnermut kajumissutsimik suleqataasussanik pissarsiniarneq ajornakusoortupilussuussasoq, Jørn Holbech isumaqarpoq. Taamaammat neriuutigaa Kalaallit Illuutaat ilaatigut ikiuisussanik ineriartortitsinermut atorneqarnissaat kommuninit aalajangiusimaneqarumaartoq.
- Maani Aarhusimi kommunimi sullissiviit qanittumik suleqatigaagut, tamatumanilu ingerlaqatigiilluta sulivugut. Taamaammat taamatut oqartoqarpat, ilisimasalittut atorneqarnissatta tulluartuunissaa takorloorsinnaavara.
Forstanderi: Ikiuisussat iliuuseqarsinnaassapput
Tigussaasumik suliaqassapput kalaallinullu inooqataanikkut ajornartorsiortunut pimoorussamik ikiuisinnaasariaqarlutik.
- Tapersersuisussat sakkussaqartinnissaat pisariaqarpoq, taamaaliornikkut ikiorniakkamik initaarnissaannut innersuunnissaannik, suliffissarsiornerini ikiuinissamut imaluunniit atornerluisuunermut katsorsarneqarnissamut aqqutissiuisinnaassallutik. Taamaammat illuatungaani attavissaqarnissaat pingaarpoq. Kommunillu suliniuteqarnerminni ataqatigiissaarinissaat pisariaqassaaq, Robert Olsen taama oqarpoq.