Igasoq sapiitsoq ullut 100-t missaanni qajartorniarluni aallartoq

Qajaq sungaartoq aappaluaartoq Qaqortumi immamut ataasinngormat ullaakkut aqqarneqarpoq.

Qajarlu taanna imaannaanngeqisumik qajartorutaassaaq.

Qajarmi taanna 3.000 kilometerinik isorartutigisumi ullut tulliuttut 100-t missaanni angallataassaaq.

Qajartortoq tassaavoq, igasoq angalatoorlu Tuluit Nunaanneersoq, Mike Keen.

Piniagassat soorlu puisit qanoq platikkeeraqartiginersut, taassuma angalanermini paasiniartussaavaa.

Taanna Qaanaap tungaanut angalassaaq.

Marlunnik siunertaqarluni angalasoq

Mike Keen assigiinngitsunik marlunnik siunertaqarluni isorartuumi qajartorluni angalavoq:

Siullermik puisit qanoq plastikkeeraqartiginersut anaasigut paasiniartassavaa. Nammineerlunili puisinniartarnaviannginnami misisissugassaminik tikitamini piniartut pisiffiginngikkunigit tuninineqartarnissi neriuutiginerarpaa.

Aappassaanillu imminut aamma misileraatiginiarpoq.

Taannami qajartorluni angalanermini kalaaliminiinnarnik nerisaqarniarpoq. Tamanna timaanut qanoq sunniuteqassanersoq aamma paasiniarniarlugu taamaaliorniarpoq.

- Kalaallit nerisassaataat misilereerpakka, ammassat, iginneq, orsorlu mamareqaakka, nerisassatsialaapput, taanna KNR-imut oqarpoq.

Qaanaaliarnermini ullormut 30 kilometerit missaanni qajartortarnissani naatsorsuutigigamiuk sungiusarluarsimalluni, Mike Keen oqarpoq.

- Qaammatini kingullerni arfineq-pingasuni sungiusaraangama sungiusaqateqartarpunga, tuikka nukkassarlugit tallinut sikkilertarpunga Tuluit Nunaatalu sineriaani qajartortarlunga, taanna nassuiaavoq.

Qassimiut Mike Keenip tikitassaata siullersaraat. Taassuma angalanera pillugu paasisaqarnerorusukkuit nittartagaa alakkarsinnaavat.