Naleraq Naalakkersuisunut tatiginninnginnermik taasititsilerpoq
Naleraq Naalakkersuisunut tamarmiusunut tatiginnikkunnaarpoq.
Partiip oqaaseqartua Jens Napätôk Inatsisartut oqaluttarfiannit taama nalunaaruteqaqqammerpoq.
Naalakkersuisuni ilaasortat Inatsisartunut ilaasortanut pasinarsaaralutik oqaaseqarnera Múte B. Egedemit qisuariarfigineqannginnera pissutigalugu tatiginninnginnermik taasitsinissaq siunnersuutigineqarpoq.
Tatiginninnginnermik taasititsinerit arlallit
Tatiginninnginnermik taasititsineq kingulleq sapaatit akunnerata siuliani pivoq, illuatungiliuttut Atassutikkut Kim Kielsen tatigiunnaarlugu taasititsipput, taassuma illuatungiliuttut paasissutissanik eqqunngitsunik siammerterisimanerarmagit.
Kim Kielsenili naalakkersuisooqatigiinnit annanneqarpoq taamaalillunilu Aalisarnermut Piniarnermullu Naalakkersuisutut ataannarluni.
Sapaatit akunnerata aallartilaarnerani Erik Jensenip Jens Napätôk paasissutissanik ingerlateqqitassaanngitsunik siammarterisimanerarlugu unnerluummagu assingusumik pisoqarpoq. Naleqqameersorli Intsisartut siulittaasoqarfiannit pisuunnginneragaavoq.
Taamaattorli Erik Jensenip pasilliutini tunuartinngilaa.
Pakatsipput
Naalakkersuisut siulittaasuata Múte B. Egedep naalakkersuisumi Inatsisartunut ilaasortanik pasinarsaaralutik oqaaseqarneranut iliuuseqannginnera Naleqqap pakatsissutigaa.
Inatsisartut inatsisaat malillugu Inatsisartut innimiginarluinnartussaapput. Nalerarli naapertorlugu Múte B. Egedep iliuuseqannginnera Inatsisartut innimiilliorfigineqarsinnaanerannik akuersaarneruvoq.
Taamaammallu tatiginnikkunnaarnermik taasititsipput. Inatsisartut ataatsimiinnerat unitsikkallarneqarpoq, naalakkersuisut qisuariarnissaminnut piffissaqarniassammata.
Tupinnanngitsumillu unillatsiarnerup kingorna IA Siumullu pinngitsoortitsinissamik siunnersuuteqarput, taakku marluullutik naalakkersuisooqatigiittut amerlanerussuteqarput.
Tassuugulu tatiginninneq tatiginnikkunnaarnerluunniit Inatsisartuni taasissutigineqassaaq.
Unillatsiarnerup kingorna akunnerit marluk ingerlareermata politikerit taasipput. 21-it Naalakkersuisunut tamarmiusunut suli tatiginnillutik taasipput, qulingiluat akerliullutik. Inersuarmiittut tamarmik taasinerat siulittaasup Mimi Karlsenip nalunaarutigaa. Taamaalillunilu Naalakkersuisut annapput aalisarnermullu inatsisisaq pillugu oqallinneq ingerlateqqinneqarluni.