IA: Kielsenip iluarsisariallit aaqqittariaqarpai
- Qinigaaffiup sinnera patajaatsumik aqutsisoqartariaqarpoq, Inuit ataqatigiit Naalakkersuisut siulittaasuannut taama allagaqarput.
Taama nalunaaruteqarneq pivoq, Naalakkersuisut sapaatip-akunnerata aallartinnerani nikisiterneqareersullu. Naalakkersuisuni nikisiterisoqarnerata kingunerisaanik Hans Enoksen aalisarnermut piniarnermullu naalakkersuisuujunnaarpoq, taarsiullugu Karl-Kristian Kruse naalakkersuisunngoqqilluni.
AAMMA ATUARUK Vittus akerliugami naalakkersuisuujunnaartoq
Aalisarnermut piniarnermullu naalakkersuisoq ukiup ataaatsip ingerlanerinnaani sisamariarluni taarserneqarpoq, tamannalu Kielsenip aqutsinerani isornartutut immikkut taasariaqakkatut Inuit Ataqatigiit nalilerpaat.
- Assersuutigalugu aalisarnermut inatsisissaq suli utaqqivarput Aalisarnermullu Naalakkersuisoq maanna arlaleriarluni taarserneqareersimalluni. Aalisarnermut naalakkersuisortaap aalisarnermut inatsimmi aaqqissuusseqqinnissamut pilersaarutini piaartumik saqqummiuttariaqarpai, ammasumik ingerlatsinikkut politikkikkullu eqqartuilluarnikkut suliaq nanginniassagatsigu, Inuit Ataqatigiit politikkikkut oqaaseqartartuat Bendt B. Kristiansen taama allappoq.
AAMMA ATUARUK Kielsen aamma Lars-Emil assortuupput
Tamatuma saniatigut Siumup iluani isumaqatigiinnginneq aaqqeqqullugu Kielsenimut kaammattuuteqarput.
- Naalakkersuisuutitatsinnut piumasaqaatigiuarput patajaatsumik ingerlatsinissaq, nuannaarutigivarpullu tamanna eqquutsimmassuk. Naatsorsuutigaarpullu Naalakkersuisut sinnerisa pingaartumillu Naalakkersuisut Siulittaasuata tamanna qinigaaffiup sinneranut qitiutissagaa.
Taannalu tunngavigalugu Naalakkersuisut kikkulluunniit ingerlatsisariaqarput. Partiillu allat iluminni qanoq aaqqiagiinngissuteqaraluarunilluunniit pingaartittariaqarpaat inuiaqatigiit toqqissisimanartumik sullissallugit.
