IA: Suliffeqarfiit aamma eqqortuunngissorisamik kalerriuteqarsinnaasariaqarput

Tusareersimasattuut Namminersorlutik Oqartussat sapaatip akunnera kingulleq kinaanermik ersersitsisuunngitsumik ilisimasamik ingerlatitseeqqiinissaq, tassa eqqortuunngissorisaminnik kalerriuteqasinnaaneq, periarfissaalerpoq, tassalu allaffissornikkut kammalaatersornermik unioqqutitsinermillu qulaajaasinnaallutik.

Tassalu Namminersorlutik Oqartussat suliffeqarfiutaani suliffeqarfiillu namminersortuni taama periarfissaqarnissaq Inuit Ataqatigiit maannakkut ammaakkusuppaat.

Inuit Ataqatigiit inatsit allanngortikkusuppaat, taamaasilluni suliffeqarfiit eqqortuunngissorisamik kalerriuteqarsinnaaneq periarfissiissutigisinnaalerlugu.

Inuit Ataqatigiit politikkikkut oqaaseqartartuat Naaja Nathanielsen Transparency Greenlandilu sapaatip akunnera kingulleq assatik pattaappaat Naalakkersuisut eqqortuunngissorisamik kalerriuteqarsinnaanermut periarfissaq saqqummiukkamikku.

Aamma atuaruk Naalakkersuisut whistleblowerimik aaqqiissutaat atulerpoq

Transparency Greenlandimi pisortap Anita Hofferip aamma oqaatigaa aaqqissuussineq suliffeqarfinnut aktianillu piginneqatigiiffinnut atuutsinneqarnissaa kissaatigalugu.

Tamannalu piviusunngussappat inatsimmik allannguisoqaqqaartariaqarpoq. Inuit Ataqatigiillu tamanna sulissutigerusuppaat.

-Inatsisinik erseqqaarissunik eqqortuunngissorisamik kalerriuteqarsinnaanermut peqartariaqarpoq. Ajunngilluinnarpoq Namminersorlutik Oqartussat iliuusassamik aallartitsisimasut, kisiannili taanna suliarilluarneqartariaqarpoq, ullutsinnilu inatsisit taamaatsillugit ajornakusoorsinnaavoq allanngortinnissaa, Naaja Nathanielsen oqarpoq, taanna Inatsisartuni inatsimmik allannguineq pillugu ullumi saqqummiussissaaq.

Inatsit 1978-imeersoq aporfiusoq

Ajornartorsiut uaniippoq suliffeqarfiit  paasissutissat, inunnut naammagittaalliutigineqartunut tunngasut, nalunaarsorsinnaanngimmatigit. Nalunaarsuisarnermut inatsit 1978-imeersoq tamatumani aporfiuvoq.

Kammalaatersortoqarsimasinnaanersoq imaluunniit inatsimmik unioqqutitsisoqarsimasinnaanersoq suliffeqarfiup nammineq misissussappagu, Inatsisip taassuma ajornakusoorsitippaa.

Taamaammallu eqqortuungissorisamik kalerriuteqarsinaanermik ilumoorullugu aaqqissuussinissaq ajornartoq,Transparency Greenland Naaja Nathanielsenilu naliliipput.

- Misigisarparput unammillernartuusoq. Nunatsinniinnaanngilaq aamma Qallunaat Nunaanni, nunatsinnisulli taama inatsiseqartumi, uatsitulli unammilligassaqarput. Isumaqarpugut aporfiit piiarnissaat assigiinnillu najoqqutassiornissaq pissusissamisoorluinnartoq. Taamaaliornissarmi  pisariaqarpoq. Takusinnaavarpummi ukiut kingullertigut kusanaatsuliornerit qulaajarneqaraangata, paasisat eqqortuunngissorisanik kaleriisoqarneranik pisuusartut, Naaja Nathanielsen oqarpoq. 

Aamma atuaruk Paasissutissanik ingerlatitseqqiisarnerup annertusineqarnissaa kissaatigineqarpoq

Grønlandsbanken suliffeqarfinnut inatsimmik unitsitaasimasunut ilaavoq. tassanngaanniillu inatsit allanngortinneqariarpat, eqqortuungissorisamik kalerriuteqarsinnaanermik aaqqissuussinisssamut piareeqqallutik nalunaarput.

Siunnersuut partiinit tamanit tapersersorneqarpoq aappassaanillu suliarineqarnissaanut nassiunneqarluni.

Inatsit akuerineqassappat Namminersorlutik Oqartussanit suliffeqarfiit pigineqartut aaqqissuussinermik taamaattumik atuutilersitsissallutik pisussaaffeqartut Anita Hoffer oqarpoq.