Kielsenip isornartorsiutaa IA-p ilisaraa: Kisianni ilissi paasinanngitsuliorpusi
Illuatungiliuttut apeqqutinik pisariaqanngitsunik apeqquteqartarput, tamannalu politikkikkut sulinermut akornutaasarpoq.
Apeqqutissinnullu akigaagatta asserluinnaanik apeqquteqaqqittarpusi.
Naalakkersuisut siulittaasuat Kim Kielsen taama oqarpoq.
Naalakkersuisut matoqqavallaarnerarlugit aammalu inuiaqatigiinniit tatigineqarnerat minnerulersimanerarlugu, illuatungiliuttut sapaatip akunnera kingulleq isornartorsiuereertut, Naalakkersuisut siulittaasuat taama oqaaseqarpoq.
Aamma atuaruk Kim Kielsen: Naalakkersuisut innutaasunit tatigineqarput
Taamali isornartorsiuineq Kim Kielsenip akueriunngilaa.
- Inatsisartuni tamanna pisinnaatitaaffigaarput isumaqarpungalu allanngortinneqartariaqanngitsoq, Naaja Nathanielsen oqarpoq.
- Isumaqarpunga apeqqutit suut apeqqutigineqartarnersut eqqumaffiginiarneqartariaqartut. Apeqqutimmi Pituffimmi pisunik Naalakkerrsuisut iliuussaannut, soraarsitsitsisaqattaarnernut, naalakkersuisuni inissisimaffinni paarlakaannernut tunngapput. Tamakkulu apeqqutit isumasioqatigiinnerni aammalu ataatsimiitarfini saqummiunneqaraangata pisussaaafiugaluartutut akineqanngikkaangata apeqqutigisartagaraagut, Naaja Nathanielsen oqarpoq, oqaatigalugulu akissutisiatik naammaginarneq ajortut.
Akissutit paasissaanngitsut
Taanna aperaarput, ilumut isornartorsiutigineqartutut apeqqutit taakkoqqissaaat apeqqutigisaqattaartarneraat.
- Ilisarisinnaavara, apereqqittariaqartarpugummi apeqqutigut akineqarneq ajormata. Aamma Akissutisiarisartakkavut erseqqarinneq ajormata sunarpiarlu akissutaanersoq ersseqqinngikkaangat apereqqittariaqartarpugut, Naaja Nathanielsen oqarpoq.
Kim Kielsenili tamatumunnga isumaqataanngilaq, aperalunilu akissutisiarisartakkatik ilumut misissortarneraat, unnerlugu ilaanni akissutit sisamariarlugit tunniuneqartartut.
Aperaarpullu imaassinnaanginersoq, Naalakkersuisut akissutaat naammattumik paasissutissiinngitsut?
Kim Kielsenilli taamaannginnerarpaa.
Apeqqutigineqartartut akissuteqaatillu Inatsiartut nittartagaanni takuneqarsinnaavoq.