IA-mit qinigassanngortitat tallimat

Sofia Rossen ullumi ullup qeqqaanerani radioaviisimi oqaluttuarpoq, IA-p siulersuisuini akuerineqarpat, nammineq qinigassanngortittunut ilaalluni.

IA-p partiiani tusarfiit ilaannit oqaatigineqarpoq, siornatigut Inatsisartuni siulittaasuusimasoq, Johan Lund Olsen folketingimut qinigassanngortittussat ilagigaat, tamannali eqqortuunersoq Johan Lund Olsenip radioaviisimut uppersarsinnaanagu oqarpoq.

Sofia Rossen neriuppoq Johan Lund Olsenilu Folketingimut qinigaajumaarlutik.

Inuit Ataqatigiit tusagassiuutinut nalunaruteqarlutik allapput, IA-p folketingimut qinigassanngortitai tallimat IA-p siulersuisuinit qangali akuerineqareersut, qinigassanngortittullu atii pisortatigoortumik nalunaarutigineqarumaartut, IA Nuummi juunip ulluisa 24-annit 26-ata tungaanut nuna tamakkerlugu ataatsimeersualerpat.

Ataatsimeersuarnermi  Inuit Ataqatigiit pingaartillugit qineqqusaarutissai ilanngullugit aamma nalunaarutigineqassamaarput.

Inuiat Ataqatigiit partiiata allaffeqarfianit tusagassiuutinut nalunaarummi,  ullumi e-mail-ikkut nassiunneqartumi, atit inatsisartuni ilaasortaanngitsut ilanngullugit nassiussiffigineqarsimasut takuneqarsinnaapput, atit pineqartut tassallutik Sara Olsvig ICC-mi atorfilik aamma biologi Nikoline Ziemer.

E-mailikkut nassiunneqartuni radioaviisimi oqaloqatigineqartoq  Sofia Rossen aamma Kaali Olsen ilanngullugit nassinneqarsimapput.

Tusagassiuutinut nalunaarummi ilanngullugit nassitsiffigineqartut qanoq paasineqassanersut tusarnaartut/atuartartut namminneq nalilissavaat.

Nikoline Ziemer aamma Kaali Olsen folketingimut qinigassanngortinnerlutik qinigigassanngortinnginnerlutilluunniit uppernarsarusunngilaat.