IA-meersup teriannissat nungutikkusukkai
Inuit Ataqatigiit sinnerlugit Qaasuitsup Kommuniani ilaasortap Kristian Jeremiassenip Qasigiannguit qanittuani Kitsissunnguani eqqaanilu qeqertani teriannissat pisarineqartut piffissami aalajangersimasumi 500 koruuninnassutigineqartarnissaat siunnersuutiginiarpaa.
2001-imili imeqqutaallat manniinik mannissarneq inerteqqutaalernikuuvoq. Timmissammi taakku ikiliartupiloornikut amerliartoqqilernissaat siunertaralugu Kitsissunnguani eqqaanilu qeqertani eqqissisimatitaalernikuupput.
Inuit Ataqatigiit sinnerlugit Qaasuitsup Kommuniani ilaasortap, Kristian Jerimiassenip tamanna allanngortikkusukkaluarpaa.
- Kiisa kinguaariit ukiuni makkunani inooriaasitoqarput, tassa mannissartarneq nalulerpaat. Ileqqoq uagutsinnut kalaallinut iluatinnartoq kinguaariit tulliinut ingerlateqqinnissaa pingaartuusoq isumaqarpunga, Krisitian Jerimiassen oqarpoq.
Taanna isumaqarpoq inuit mannissaqqissinnaalertariaqartut, timmissallu amerliartoqqilissappata teriannissat ikilisarneqartariaqartut.
- Teriannissat manniaqqanik annertuumik ilanngartuisuupput. Taamaammat Kitsissunnguani eqqaanilu qeqertani teriannissat nungusarnissaat Qaasuitsup Kommunalbestyrelsianiit immikkut ukioq manna aningaasaliiffingisariaqarparput, Kristian jerimiassen oqarpoq.
Taassuma piffinni taaneqartuni innuttaasut piffissami aalajangersimasumi terianniarniarsinnaanissaat, terianniarlu ataaseq 500 koruuninnassutaasarnissaa siunnersuutiginiarpaa.
Imaanngilarli qanorsuaq terianniarniartoqassasoq. Siunnersuuteqartummi 100.000 koruuninik immikkoortitsisoqarnissaa kissaatigaa. Tassa teriannissat 150-t pisarineqarnissaannut 75.000 koruunit akiliutissatut, kiisalu 25.000 koruunit teriannissat piniarneqarneranni kommunip nukkutilliisoqartitsineranut atorneqartussatut takorloorlugit.
Kristian Jerimiassenip siunnersuutaa maanna Qaasuitsup Kommunalbestyrelsianut nassiunneqarsimalerpoq, oqaluuserineqassanersorli suli aalajangerneqanngilaq.
Qaasuitsup Kommuniani teriannissap pamiua 125 koruuninnassutigineqartarpoq.
